Oté

Pou bann SDF na poinn shanjman don ?

Justin / 19 juillet 2012

Katorz zilyèt ? Sa la fèt nasyonal bann Fransé. Kan la fèt sa l’ané 1790, l’apèl sa la fèt la fédérasyon, donk l’antant rant bann nasyon fransé ; in gayar fèt, in gayar fèt révolisyonèr. Mi pans pa demoun va di lo kontrèr ! Poitan, samdi pasé lété la fèt katorz zilyèt é mi konpran pa ankor zordi sak la éspasé. Antansyon, mi vann konm moin l’ashté !
A s’ki paré, an prékosyon défilé militèr, la dégaj bann SDF, l’a anvoy azot pli loin oir si zèrb lé pli vèr, é si d’lo lé pli fré. Mi pans désèrtin i trouv zot i déparèy. Sansa zot lé riskab shok in pé la vi bann moun nana lo moiyin, épi bann gro vaza. Somanké, galman in pé i pans zot i ranvoy pa in bon l’imaz la Répiblik... Sanm pou moin, si sa i shok bann z’otorité, zot nora myé fé agard lo problèm plizavan. Pars pou moin, la pa bann SDF lé shokan, mé la mizèr zot lé d’dan. Sak i shok amoin vréman, sé in sistèm sosyal k’i lès demoun dann in sityasion konmsa.
Bien antandi, kan la fé in koktèl la préféktir, bann SDF té pa invité. I fo kroir zot la poin asé bone boush pou èt invité la-ba. Mésyé lo minis la di, la Répiblik i mérit bien in koktèl ; i mérit bien in fèt. Mé bann pov, bann SDF, na poinn shanjman pou zot don ? Kosa i mérit azot ? Konm di lo prézidan, shanjman i komans jordi. Mé, sof mon réspé, i shanj pa arien pou bann SDF don ? Kansa shanjman i komans pou zot ?

Justin


Kanalreunion.com