Oté

Pou dimansh, li profér alé takinn lo makabi !

Justin / 11 décembre 2015

Mi sort koz in pé èk mon dalon travay, in dalon dopi lontan minm, tanzaot ni wa nou, ousinonsa ni apèl a nou kansréti pou koz in pé, kiswa pou an awar nouvèl, ou kiswa pou kass in pé lé kui osi mé nou néna kontak réguilié, in dalon boudikont konm nou di nou minm pou rofé lo mond ansanm. Donkalor ni koz in pé é konm nou lé an plin dann zéléksyon, inposib pou nou pa anparl ladsi dimansh.

Donkalor dalon kosa ti fé dimansh, ti bouz, ti bouz pa ? Pou son par ali, li di a mwin konmsa, minm si na inn i pèy mon déranzman dimansh mi profèr alé takinn lo makabi. Pou kosa ? Daborinn vot pou kisa ? Konm li di, li la argard lo sobatkoz dann télé, na pwin inn la klèrsi in pé son lidé, li rotrouv pa li dann program linn a lot, pou li tou lé dé va aminn a nou dann malizé.

Lé in pé domaz an ariv konmsa, mé sanm pou mwin, konm mi antan in pé dann mon lantouraz néna kèkzin i koné pa ankor zordi pou kisa zot i sar fé dimansh é pétèt konm mon dalon, zot osi zot i sar takinn lo makabi. Si tan télman lé pa tro klèr pou désertin, konm mi antan osi parisi, parlaba, pétèt néna i sar shié èk la mas dimansh. A mwin pou mon par, mwin la domann mon dalon “Aminn dé golèt“


Kanalreunion.com