Oté

Pou èt réglo, fo fé lé dé gran sérviss !

Justin / 9 févrié 2016

Bann gramoun lontan lavé in bon lésprésyon pou di, kan in boug na pwin aryin pou fé ousinonsa pou in moun i koz toratravèr, gramoun té i di “kan ou na pwin aryin pou fé ousinonsa pou di ou pran dé ti bwa é ou sar zoué dan la m…“. Ala sak lo prézidan départman lo Haut Rhin noré di fé olièr rakont la kouyoniss konm li la fé, pou koz d’si bann moun i gingn lo RSA. Pou li, di moman in moun i gingn inn ti moné, pou lèr li parl plis pou lo RSA pou li lo moun i dwa rann kont.

Pou lèr li koz bénévol, kiswa pou in lasosyasyon, kiswa pou bann rotrété tousala, mé ni koné koman i éspass, i komans par bann bénévol aprésa i dovyin obligatwar. Déza, sé koué lo RSA ? Krwa pa kan in moun i gingn lo RSA li gingn in fortinn. Tou zis si néna pou manzé anndan la. Pou in moun sontousèl lo RSA i roprézant apopré 500 éro, aprésa si lo moun néna in zanfan li gingn in katsou an plis, si néna dé li gingn inn ti pé plis mé pou vréman na pwin pou fé la fèt.

Dizon i donn sa ziss pou anpèsh krèv la fin. Ala na d’moun i ral lo kèr la d’si. Lo prézidan la ba déor i di konm sa si néna i rofiz, alorss li va koup lo RSA, néna la lèv an guèp pou di lé pa réglo tousala. Pou lo RSA, la lwa i di, i pé pa donn lo RSA é an minm tan obliz lo moun èt bénévol. Kantanou, nou néna in méyèr propozisyon, pou èt pou vréman réglo èk la lwa, ni di anon mèt an plass lé dé gran sérviss !


Kanalreunion.com