Oté

Pou évit a nou dézagréman !

Justin / 15 zanvié 2016

Sèt ané 2016 i tonm in lané blan sèk pou zéléksyon. Na-d dogré ou lé a domandé si i tonm pa byin arèt in kou pou ésouflé. 2012 lété zéléksyon prézidansyèl èk zéléksyon dépité, boudikont 2013 i tonm èt konm inn ti ropo, 2014 zéléksyon minisipal, aprésa zéléksyon éropéinn, débi 2015 zéléksyon départmantal, mwa d-désanm zéléksyon rézyonal. Pou sak na bozwin va profit pou défatig in pé an 2016.

Néna va profit pou défatig in pé, mé néna lé déza dann brankar pou lané proshinn, pou zéléksyon prézidansyèl, zis apré zéléksyon dépité. Sanm pou mwin, anndanla, lo pli zinportan i tonm lo zéléksyon prézidansyèl boudikont, sépousa la ba déor déza lé andiskisyon rant zot pou war kisa i sar èt lo kandida d’la gosh. In gran diskisyon pou vréman. Tou zis si i tir pa kart pou war kisa i roprézant la gosh ? Lo prézidan li minm li rovyin ousinonsa li pass son tour ?

Pou lèr désertin i koz, désertin i akout. Mi antann, néna i di, lèr la, anon rod in kandida i tyinbo son promèss in kou, konm si sad la la ramass a nou la krak. Mi antan i di osi, fo a nou in kandida a gosh pou vréman konm si sad la, la kouyone a nou. Galman, déranz pa éxopré pou nou, kan variv lèr na war é sirtou, ni vé inn i promèt pi a nou aryin konm sa va évit a nou dézagréman !


Kanalreunion.com