Oté

Pou fèr plis, mounoir ! Pou fèr plis !

Témoignages.re / 22 décembre 2009

Na dé foi, déssèrtin moun, i anparl kékshoz zot i koné pa. Dizon, sa lé normal, pars ète o-kourann toute z’afèr lé pa possib, épi fèrm out také toultan… sa lé dir, lé karéman pa fézab. Solman nana déssèrtènn shoz ou i koné in pé plis ké d’ote. L’èr-la, ou lé pli a-lèz, konm Blèz… pou di oute dé mo. In légzanp ?
In délégasyon demoun La Rényon, la sorte issi épi la parti Copenhague. Pou kossa ? Pars nou issi, ni koné kossa i lé "l’effet d’serre", ni koné kèl danzé i ménas in bon pé réjyon, ni koné ossi dézagréman nou lé riskab an avoir, par raport l’éshofman klimatik. Donkalor, lé normal ni sava fé antann nout voi la-ba… épi mète anou in pé o-kouran sak lé z’ote i fé, épi zot problèm. Kissa té i koné avan, lo sobatkoz, sak Danemark té i fé pou son dévlopman dirab ? Kissa té i koné oussa Tuvalu i lé, é l’an-nuyman li lé d’dan ?
A z’ot avi, Montrouge, gran diréktèr zournal la droite té i koné sa li ? Pétète... mé li té anparl pa souvan... Li té préfèr fé gran kozman déssi la politik La France, sansa déssi Obama, épi d’ote gran grèk ankor... Epi mélanz sa avèk kanar troi pate l’aktialité La Rényon. Poukoué fé sa ? Konm diré in poète mi èm byin, i apèl Albany : "Pou fèr plis, mounoir, pou fèr plis !"

Justin


Kanalreunion.com