Oté

« Pou gingn in zépi mayi, plant kansréti in grin ! »

In kozman pou la rout

Justin / 20 séptanm 2016

Sa sé in kozman mi koné dopi lontan é mi ansèrv tazantan. Pou dir kosa ? Pou dir si ou i vé trap in rézilta, mèm in pti rézilta, i fo ou i fé in n’éfor pou trapé. Konm i di : « Poulé roti i sar pa shap di syèl diréktoman dsi out tab ! ». Toulmoun i koné, mé na dé foi, ou na l’inprésyon désèrtin i obli apliké. I kont dosi lo azar ! I kont dsi la fatalité ! I kont dosi lo déstin ! Mé, mi pans, mèm lo déstin, i fo tazantan ou i fors ali in pé. L’androi moin l’arivé, moin lé a d’mandé si par ébzanp dann la lang fransèz nana in provèrb i vé dir la mèm shoz ké sa. Mi pans ke oui pars, sanm pou moin, moin la lir in n’afèr konmsa dann mon liv léktir Dima : zistoir in papa dsi son li d’mor. Li di èk son bann marmaye na in trézor dann la tèr li lès po zot mé trézor la poin é avèk lo travaye lo rannman avèk la prodiksyon la goumanté é lo paz léktir i fini konmsa :lo pèr laté bien saz pou dir avan son mor, ké lo travaye sé in trézor [1].

[1« Lo labourèr avèk son bann zanfan »-in fab Zan dé Lafontaine.


Kanalreunion.com