Oté

Pou I’itilité piblik... konte l’initilité piblik !

Justin / 18 novanm 2009

Na dé foi ou i pé an avoir l’inprésyon ète dann in drol péi, sansa an avoir afèr in bann drol moun... Mi vé anparl in pé bann dirizan la Droite k’i roprosh bann Lalyans fé rèv bann Rényoné. Fé rèv demoun sré in n’afèr k’i fo pa fèr ? Poitan, nout tout i koné, si demoun i rèv pa, zot lé riskab rakoursi z’ot vi… Bann syantifik la vérifyé sa dann laboratoir... Donk, in dirizan k’i nyabou fé rèv demoun, i fo konsidèr li lé itil pou vréman.
Pétète zot va pans li lé pa la pou sa, li lé la pou fé bon projé pou la popilasyon : pa aryink fé révé, mé réaliz lo rèv... Zistoman, kan i promète la route tamarin é i fé la route tamarin... kan i di Air Austral v’ashté dë gro laviyon é Air Austral i ashté l’aviyon pou tash moiyin fé bèss lo pri biyé l’aviyon, kan i promète l’égalité bann kiltir é i avans dann shomin-la, kan i di va fé la MCUR é i fé toute pou ariv o bi, kan i promète l’otonomi énèrzétik é i avans vitman dann diréksyon-la...
L’èr-la, lo dirizan lé byin dann son rol : li la promète é li la réspèkt son promèss. Arzoute ankor sak li la réalizé lé byin bon pou lo péi. Donk, li lé itil... I pé mèm di ké li lé d’itilité piblik. An kontrèr, kan in bann dirizan la Droite i koné pa kansréti fé rèv demoun in pti pé, kan z’ot prozé lé nil, épi i pran pa kont nout l’avnir. Arzoute èk sa, zot i kass sak lé fine paré pou fé é zot i mète dann shomaj in gran kantité travayèr... L’èr-la, i pé di, san égzazéré, zot lé vréman d’initilité piblik. Fransh vérité !

Justin


Lésplikasyon inn-dé pti mo :

Drol : i vé pa dir i fé ri… i vé dir lé in pé bizar, in pé étonan

L’otonomi énèrzétik :
pou évite gaspiy larzan dann pétrol, sirtou ké pétrol napi tro-tro

L’égalité bann kiltir :
sa sé in n’afèr révolisyonèr, in nouvo manyèr oir lo mond

Itilité piblik
 : sa i vé dir i ansèrv l’intéré zénéral

In l’aviyon 840 plas : i prétan dir sé la konpagni rényonèz la domann sa pou fé bèss lo pri biyé trante pour san


Kanalreunion.com