Oté

Pou in éro par èr d’tan !
Sa la pa inn vi !

Justin / 28 novembre 2011

Olivia Rivière, in jenn fiy Cilaos i sort gingn in dékorasyon. La pa ninport akèl, vi k’èl i sort gingn lo tit"méyèr z’ouvriyé la Frans". La poin bonpé d’moun i gingn in dékorasyon konmsa. Pou sa, èl la pran par-la kat san z’èr d’tan pou fé in jour d’ Cilaos. Son travay té tèlman bien ké la rokonète aèl konm moin la di an-o la pou in travay i apèl "une étoile de rêve". In gran zour pou in moun, i paré, l’avé zamé pran l’aviyon é son promyé voiyaz l’amène aèl dann palé l’Élizé èk in dékorasyon prézidan la Répiblik la romète aèl. Sa i ariv pa ninport ki, sa i ariv pa toultan. L’èr-la, ni doi ète fyèr pou nout konpatriyot. Ni doi ète fyèr galman pou tout bann z’ansien la fé pass so téknik "zour silaos" zénérasyon an zénérasyon. Ni doi ète kontan galman pou Cilaos.

Mé Cilaos lé près abityé gingn rékonpans konm sa ! Mi pans sa i fé troizyèm pèrsone, dann Sirk, pou gingn rékonpans-la é sa i pé k’ankouraz bann jenn fiy l’androi pou kontinyé sak bann z’ansien la nyabou prézèrvé épi mèm rann pli zoli ankor avèk lo tan. Solman, moin lé sir in bonpé d’moun i doi poz la késtyon dsi l’avnir ; promyé késtyon bien sir, sé pou savoir si in moun i pé gingn son vi la-dan, sansa kontant ali fé zoli z’afèr pou bann touris aprésyé, pou bann katalog prézanté. Fé joli z’afèr lé bon, mé viv èk son travay lé pli méyèr ankor.

Zordi, d’apré sak moin la antann dir, i gingn pa la vi la-dan, pars i fo travay lontan pou ariv fé in n’afèr bien prézantab, bien prop, bien aprésyé. Moin la antann in madam dann in radyo apré di èl i vann in jour d’Cilaos pou san sinkant éro, mé èl i mète plis san z’èr d’tan pou fé in n’arfèr konmsa, pou gingn, d’apré sak èl i di, in éro par èr d’tan. Moin lé sir an parmi bann moun i okip l’artizana, désèrtin i kalkil, i rode solisyon pars sa la pa inn vi, travay pou in éro par èr d’tan.

Justin


Kanalreunion.com