Oté

Pou in vré Zourné intèrnasyonal kréol !

Justin / 29 octob 2011

Yèr lété la Zourné intèrnasyonal bann lang épi bann kiltir kréol. Sa in zourné i égzis dépi trant-an. Solman, i diré i fé pa tro in kont ansanm. Pou kosa ? Mi koné pa tro ozis, mé sanm pou moin, sa lé konm sa. Pétète zot i pans sak mi di la pa tro vré ? Pétète zot i pans na dmoun lé zamé kontan, si tèlman ké zot i rann mèm pa zot kont tout sak i fé. Lé ga, kan nana la fète shinoi, i pé pa dir ni rann pa nou kont. Kan nana Dipavali, forsé ké ni rann anou kont. Promyé zanvyé, Zour d’lan, sa ni koné. La Noèl, sa la pa in fète ni mank. Mé Zourné intèrnasyonal kréol, sa i pass koté nou san k’ni romark, konm lo dsi fèy sonz.

Ofète, kosa mi èmré ? Mi èmré i fé pète in gayar z’afèr, la mizik, la dans, zistoir, manzé mélanzé. In fète ofisyèl ? Mi pans pa sé sa k’i fo anou. Pou koué mi di sa ? Pars, sanm pou moin, in fète ofisyèl lé konm ki diré in n’afèr in pé konstipé. Tout fason, lo kolonizatèr i poz la min dsi : zèrb flèr li, diskour an fransé li, mé nou, bann ti kolon, nou lé bordé dann in kékshoz konmsa. Moin té i préfèr in fète an dalonaz, an parmi d’moun konm nou mèm, konm dann tan té i fé bal maloya dann kann. Ala kosa moin noré émé, mé la pi konmsa i fé sa... Mi vé pa dir, la lang avèk la kiltir kréol, sa i doi rès an maronaz. Pars lo maronaz lé pli otantik.

Otantik, ala lo mo lé lashé. Lo kozé i doi ète otantik ; Lo manzé i doi ète konmsa galman. La mizik otantik osi. La vi anparmi, lo santiman, tousala i doi ète otantik. Si la pa otantik, lèss ! Si lé solman touristik épi égzotik, lèss tonbé ! Lèss tonbé, nou la pa bézoin in n’afèr artifisyèl konmsa. Nou la bézoin la lang, in gayar kalité la lang. Nou la bézoin fonnkèr, in bon kalité fonnkèr. Nou la bézoin maloya, séga épi mizik kréol, bon kalité mizik kréol. Armète la dsi in l’anbyans, in bon l’anbyans kréol. Mon dyé ségnèr, mi souète, avan mi sava oir aou, koté k’vi lé, mi domann solman, konm moin la di aou, in vré Zourné intèrnasyonal kréol.

 Justin 



Inn modékri, inn ti lavi, inn komantèr ?



Bann modékri andann forom






  • Aa Zistyn, kom ou y di, inn ti fèt y rosamb krèol noré pa fé lo tor nout ti pèï !
    Soman, dann inn gayar fèt koma fodré toute domoun y mèt cèt zot, toute domoun y vien ek zot racine.
    Kom ou y di, toute cèt nou y fé, fo kommandèr y armèt zot grin do sel, fé inn kozman toute domoun y konpran....en fransé souplé !!!
    Ma lé pa raciss soman a fors rode fé zié dou bonn zoreil nou la mèt inn koté cèt nou lé !!

    Pou gyin inn zourné krèol kom nou émré y fé, fodré domoun y vien kom kréol.
    Toute domoun même dégré, même kalité !

    Soman zordi ou koné inn bonpé domoun y gyin di zis " a moin kréol" ???.
    Aha, zordi y di a moin lé ici, a moin lé lot koté...na inn y va ni ek son gro loto, lot va ni ek son linz la mess.
    Rode pa si lo mèr saye mèt anndan....nou kanar lé noir, kom y di !
    Pou gyin fé in nafèr "otantik" , fodré kréol y arsouvien cèt li lé....

    Mi lir ou ti lartik tou lé gran matin... sa inn nafèr y fé plèzir a moin ! romersiman a ou

    Article
    Inn modékri, inn ti lavi, inn komantèr ?


Kanalreunion.com