Oté

Pou kansa lo plan Marshall pou La Rénion ? Mi pans lé présé éstèr !

Justin / 8 désanm 2012

Na in tan, l’avé in sénatèr rénioné té i apèl Ramassamy. Dann tan-la, si mi tronp pa, lo prézidan té i apèl Mitterrand. Dann tan-la, té i diskit in plan pou arfé démar l’ékonomi la Lorraine. Donk lo sénatèr la pran la parol pou domandé pou kosa i fé pa mèm shoz pou La Rénion. Gouvèrnman la réponn ali, é mi pans mal réponn ali, vi k’la di ali i fo konpar sak lé konparab é i fo pa kont dsi in plan sovtaz pou nout péi a nou. Aprésa, lo tan la pasé : na in paké gouvèrnman droit konm gosh la vni inn déièr l’ot... mé san aplik in plan sérié pou dévlop lo péi.

Na dé-troi zour, dan nout zournal “Témoignages”, moin la lir na in bonpé d’moun san travay la désid pi fé mark zot nom Pol Anploi pars zot i pans sa i ansèrv de riyin, alor si zot na poin lo droi l’ASSEDIC, sansa si na poin in plan pou done travay zot katégori d’moun, konm bann jèn, konm bann sénior, é bin zot i fé pi démarsh pars pou zot, sé lo tan pèrdi. Mèm bann moun l’INSEE i rokoné in n’afèr konm sa. Mèm Pol Anploi i rokoné..

I fo dir, bann shif i fé pèrd aou kouraj : bann shomèr long diré, i fo troi z’ané pou artrouv sak i apèl in solision, kisoi in formasion, kisoi in pti kontra. Plis soisant pour san bann jèn an az travay i trouv pa i kékshoz pou brouté. Plis sèt mil diplomé dann shomaj. I pé pa di la sitiasion lé pa grav. Pou in pé, èl lé dézéspéré. Kosa i fo fé ? Alé an Frans, mé la-ba, nana plis troi milionn moun i rod travay… troi milion sis san mil, d’apré l’INSEE. Alé in n’ot koté ? Mé bann réfijié, sa lé foulé sa partou. Kontant ma mizèr ? An atandan, na in pé i angrès azot, é sa lé inzist.

Dovan in sitiasion konm sa, kosa i rès pou fé ? I fo in plan sovtaz pou La Rénion. Sirtou, i fo pa lindi i anons anou sink-sis ti mézir pou La Rénion pars lé riskab ésplozé ! Pars, konm di lo kont, moun vilin nana ankor, mé moun kouyon na moin-z-an moin... Kan la Frans épi l’Erop lété krazé apré la guèr trant nèf-karant sink, l’Amérik la fé in plan Marshall. Akoz pa in plan konm sa pou nou avèk la Frans épi l’Erop ? Akoz pa osi in l’èd bann nouvo péi émèrjan ? Mi pans lé présé sa éstèr.

Justin


Kanalreunion.com