Oté

Pou komans galizé, donn travay kréol !

Justin / 16 févrié 2016

Sanm pou mwin pou èt galizé pou vréman, kiswa galizé rant nou minm, kiswa rant nou èk la frans, sinonsa rant nou èk lorop ousinon rant nout tout, sanm pou mwin sé si la késtyon shomaz, promié boubou nout péi, sé la d’si k’ni dwa fé travay nout koko, pars si in moun i travay pa li pé pa prétann èt in moun. Ni pé pa, èk 30 pour san shomaz èt galizé. Ni wa byin koman in moun san travay, koman li lé maltrété. Déza dann lo kozman minm li lé maltrété.

Kan in moun i rankont in ot moun promié késtyon, kosa ou fé dan la vi ? Si ou néna in bon sityasyon travail dizon ou lé antandi konm in matador, si ou di ou travay pa i argard a ou konm in zouèr kart. Isi minm ni di souvan-dé-fwa nou néna talèr 150 000 shomèr, pétèt minm plis. Koman ni sar sobat kont sa ? Konbyin d’tan na mèt pou guéri nout boubou ousinonsa zis soulazé ? Lé vré la sityasyon lé konm sa dopi in bon koup do tan.

Mi sipoz lo gouvérman lé informé zour pou zour, mi sipoz bann minis loutromèr in apré lot i wa, lo prézidan li minm lé v’ni rann a li kont par li minm é la zordi nou néna in moun la kour konm i di lé la éxopré pou okip la késtyon galizé. Si la d’si ni wa pa in lanbèkman séryé avan 2017 sanm pou mwin pou lo rèss ni pé kour touzour. Konm zordi la miniss galizé i konpran a nou, i konpran byin nout kréol, ni di “Pou komans galizé, donn kréol travay“.


Kanalreunion.com