Oté

Pou kontinyé lo rèv in bonpé rant nou la fé dann tan Paul Vergès lété prézidan La Réjyon

Justin / 26 mars 2014

Matant Zélida la ékrir Justin :

Mon shèr nové, mon spès salté rouj-de-fon dovan l’éternité,
Mi sort aprann in kékshoz, mi koné pa si lé bon sansa si lé pa bon. I paré la-ba, dann Sin-Lé la mète la klime dann in lékol. Sa la kout in bon moné, mé a s’ki paré bann marmay é bann pèrsonèl lé kontan. Dizon inn bone shoz ! Mé moin lé pa pou k’i grandi bann marmay dann boit koton. Zordi i fé sho, i fo la klime ! Talèr i fé fré, i fo shof la klass ! Apré-domin la plui i mouy, i fo bash lo shomin ! Apré sa i kontinyé, i fé sa la kaz demoun. Pou mon par, moin lé pa pou sa, mi pans i fo dirsi lo kor, donk k’i fé sho, k’i fé fré, k’la pli i tonm, k’lo van i souf i fo marmay lékol i travay, i fo bann z’amontrèr i fé zot boulo, parèy pou bann nénen lékol. La kèl lé pli for, lo bon sansa lo mové ?Donk ,pou moin, lo mové lé pli inportan ké lo bon dan sète afèr. Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr i étone ma moin sak ou i di !
Alor, dann biro i mète la klime. Dann magazin i mète la klime ! Dann mézon galman sak nana in pé lo moiyin ! Sa lé bon, mé amélyor in pé travay dann lékol sa lé pa bon. Bin, moin m’a dir aou lo kontrèr. Pou troi rézon :

Inn : moin lé sir kan i fé vinn-sink dogré dann la klas, i travay myé ké kan i fé trant-uit dogré, kisoi pou marmay, kisoi pou lo pèrsonèl.

Dé : par la klime solèr lé bien pli proférab ké sak avèk lénèrzi non dirab pars fé avèk pétrol épi sharbon.

Troi : pars si i fé sa, i vé dir ké domin La Rényon i sa prann son plas dann l’otonomi énèrzétik, épi la konkirans dann lésportasion son prosédé invanté....

Arzout èk sa, l’éshofman klimatik lé pa pou arèté, é oplis lo tan va passé, oplis va fèr sho. Konm pou la protéksion bann tèr kont l’inondasion, i fo dévlop in protéksion kont la shalèr... Alé pli loin : ou i pans pa sa i pé ède anou pou fé nout révolisyon téknolozik ?

In kalité manyèr pou répar in pé lo rèv in bonpé rant nou la fé dann tan Paul Vergès lété prézidan La réjyon. épi lo didier la kasé.Tok ! Pran sa pou ou !

 Justin 

NB : Sa i vé pa dir moin lé pou mète la klime é fé travay bann marmay épi bann amontrèr dann la pèryod shalèr, pars moin lé pli favorab lo l’ané klimatik. Minm dann in ka konmsa, i fé sho dopi séktanm ziska désanm é moi d’mars la shalèr i shale. Donk la klime dan lékol sa i pé ède bien konm k’i fo. Parl pi si konm i di l’éshofmann klima i sar fé mont ankor la tanpératir,rant dé épi kat dogré.


Kanalreunion.com