Oté

Pou kosa la tyé Thomas Sankara, in martyr lo pèp burkinabé

Lo pti kolonyalis ilistré 3

Justin / 30 out 2016

Sak i pé alé dsi you-tube, mi pans zot i dovré fé lo détour. Mi pé dir azot la pa bézoin alé lir bann gro-gro liv pou an avoir in idé dsi l’asasina in gran révolisyonèr péi l’afrik. Moin lé sir zot va aprann dé shoz i mank ar pa d’étone azot, mèm dési bann gran pèrsonaz zot i pé aprésyé pars banna la lès z’ot mark dsi l’istoir ban gran péi konm La frans. Pars zordi ankor ni pé parl dsi La frans kolonyal : sak la fé sanblan dékoloniz l’afrik, mé sanblan solman. La France - afrik si zot i vé apèl lé shoz par lo nom k’i fo done azot.

Par égzanp moin la vi in pti fime dési in vizit François Mirtterrand la fé dann péi i apèl zordi lo Burkina-Faso, avan sa téi apèl la Haute volta avèk konm vil kapital Ouagadougou-bann z’éspatryé i apèl sa Ouaga, konm Moufia sé « la moufia » dann la boush bann robatizèr. Donk kapitène Sankara i fé in diskour pou arprosh La Frans an avoir konm z’ami désèrtin moun nana lo san dsi la min konm Botha in l’ansien prézidan dann tan l’Afrik di sid dsou l’aparteid... Mitterrand, zorèy la siflé, mé kan li la pran la parol li la di lo boug li osi sar fran é li la roprosh lo zène kapitène révolisyonèr alé tro loin dann son kozman.

L’ané 1986, la fé in zéléksyon dépité dann La frans é la droit la gagn lo zéléksyon. L’èr-la Jacques Chirac la pran lo post promyé minis. L’èr-la li la rofé vnir mésyé Foccard é mésyé-la li la artrouv son bann z’ami konm Houphouet Boiny, prézidan la Côte d’Ivoire, inn an parmi lo méyèr z’ami la Frans kolonyal. Mésyé Foccart la konpri tout suit rant Sankara é son dalon-son frèr konm demoun téi di ! - Blaise Compaoré lé shoz téi gaz pa bien. Si tèlman ké lo match la pongn rant lé dé bononm la tèrmine par l’asasina lo kapitène ! Sankara avèk douz son bann dalon l’ané 1987, lo kinz oktob .

(la pankor fini - proshin bout dann’lo pti kolonyalis ilistré - 4)


Kanalreunion.com