Oté

Pou lo pé i pran son marsh an avan

Justin / 31 mars 2011

Kan dann in péi nana près karant pour san dmoun an az pou travay lé marké dann pol anploi. Kan na plis la moityé d’moun lé dossou lo sèy la povreté. Kan plis disète pour san dmoun lé dann la mizèr noir é plis san dis mil lé ilétré. L’èr-la, ou i pé di lo péi la tonm dann in famé tablatir. Pétète, ou i pans na poin solisyon pou tir ali la-dan.
Solman kan ou i oi tousa loto, kamiyon moto. Kan ou i an apèrsoi nana sé pa konbien d’moun na bak plis kékshoz. Kan ou i oi nana linivèrsité, lékol an poundyak, lopital konm sa ! é bann l’administrasyon bien roganizé, kouran éléktriik partou, lo kourant pou près toulmoun, é la sékirité sosyal pou tout sitoiyin, moin lé sir ou i pé grate out tète pou sèy konprann sak i éspas dann péi-la.
Arzoute èk sa in loséan èk bon pé poisson, in lagrikiltir bien ékipé dann in tèr fèrti, in réjyon bien étidyé pou lénèrzi ronouvlab. L’èr-la ou i pé pans si lo péi lé dann in movèz pass, sa la pa pou toultan. Mète an plis li lé dann loséan indien, an plin dann milyé bann péi rish é myé ksa li nana in léstati réjyon La France é réjyon éropéin, ou i pé pa pèrde léspoir.
Sak ou i pé dir, sé ké lo péi la bézoin konm ki diré in plan Marshall déssi dizan, sinon plis pou tir ali dann l’anbara. Mé kissa va fé plan-la pou li ? Ali mèm. Mé kissa va pèy sa ? Sak la mète ali dann trin konmsa. La France an promyé, épi l’erop bien sir ! Akoz ? Pars, si zot la pa konpri amoin, sa i vé dir lo péi i marsh la tète an ba é i fo armète ali déssi son dé pyé, sansa son kat pate. Konmsa li va gingn pran son marsh an avan.

Justin


Kanalreunion.com