Oté

Pou lo rèst na oir apré !

Justin / 30 mars 2011

Matante Zélida la ékrir Justin :

Mon shèr nové, mon spès salté,
Mi pans zot lé fyèr jordi. Lo roi la pa zot kouzin. Zot i toush pi la tèr zot la ! Poitan, si moin té zot moin noré méfyans. Pou kossa ? Pou komansé pars zot na poin lo soutien lo pti prézidan Sarkozy épi son gouvèrnman. Sa lé riskab fé mal azot ! Zot na poin non pli lo soutien méssyé Didier é tansyon son vanjans ! Arzout èk sa, zot i rant dann in bato dann milyé la tanpète é si i amène pa bien lo mashine, mi pans lé riskab koulé. Moin lé sir, pou finir, si zot i rogard bien, zot va trouv inn-dé grinn bébé dann panyé mayi-la. Tok ! Pran sa pou toué !

Justin la fé pou répons :

Mon vyé matant k’i koz touzour la boush rouvèr,
Mi oi, konm lo gran shansonyé Fourcade téi shant, "dépitasyon la pri aou !". Sa lé normal ! Vi k’ou la kroir sak bann kriyèr d’nuite téi di. Zo té i sar tyé sète, blèss katorz mé la koup la manké. Zot la afayi plito k’ranforsé. L’èr-la, tout i koné sar difisil pou trouv in manyèr bien avansé. Mé ki di difisil, i di pa inpossib. Inpossib la pa kréol rényoné... provik nana in bon program, provi k’i amène nout péi dann trin lo dévlopman dirab, provi k’i drèss in boukliyé sosyal pou vanj kont la kass sosyal l’UMP, sirtou provi k’nana l’antant. Biensir, nana in pé rogré dann nout kèr, mé la pa lo tan pou rogré. Shak zour na son program, zordi nou lé kontan a katrovin pour sa, é pou lo rèst nou va oir apré.

Justin


Kanalreunion.com