Oté

Pou mèt an lèr in zourné, pou bat a tèr toultan !

Justin / 22 novanm 2014

An so moman, si in moun i lir in pé zournal tanzaot, i rogard télé osi néna in sizé i rovyin an boukl, i koz ryink si zéléksyon miss. Miss par isi, miss par laba. Pa promié fwa i an parl, vik shak éstan néna zéléksyon, shak éstan i an parl. Minm bann télé i sobat antrozot pou war kisa nora lo drwa difizé sontousèl. Minm si lo sizé i ral pa ou tro ou pé pa pass koté, ou pé pa gnoré dikou. Mwin lé prèské sir néna i sar mont si mon lanp apré mon kozman la d’si. I sar di, li sé in aryéré d’kour pou koz konm sa ousinonsa li vé donn lèr èk son révèy i marsh pa ou ankor li koz touzour toratravèr, touzour po krétiké, zamé lé bon pou li, tousala. Mé zordi mi gingn pi tro rotonir, mi rolash a mwin in pé la d’si.

Fransh vérité, mi parl pa pou zot, mi an parl pou mon par a mwin. Sa la pa lo méyèr zafèr pou mwin, fason i fé i konvyin pa mwin ditou. Poukoué ? Mi romark a shak fwa ni yinm in nafèr, ni fé zéléksyon miss dosi. Sézon létshi, ni fé zéléksyon miss létshi, mwa d’zwin zéléksyon miss gouyavié, aprésa miss shoushou, miss bishik dot ankor. Donkalor, èk sak ni yinm ni fé miss ? Tou lé zour néna zéléksyon miss. Poukoué pa fé miss gato patat vik ni yinm patat ? Miss la kouyoniss osi. Poukoué ni fé pa miss boudin vik ni yinm boudin ? Arèt in kou gaskongn nout zénèss mézami. Sanm pou mwin tousala lé pa fé pou rolèv a zot.

Voui, pou mèt an lèr bann fanm, néna sirman mwayin fé otroman, daborinn nou néna lo 8 mars, in zourné rokonésans pou bana an zénéral. Lo 8 mars zourné d’la fanm, sétaki i fèt son manièr, i fèt son momon, son madam, son fy, in néstan solman, mé mondié sénièr konbyin 8 mars i fodré pou galisé èk lo tan la kouyonss i dir ? Boudikont fé batay linn alot. Zot i romark pou mèt an lèr in zourné pou ral a tèr toultan.


Kanalreunion.com