Oté

Pou nou ansort anou pou vréman !

Justin / 18 juillet 2011

Kossa zot i diré d’in moun la fine bien grandi épi la fine trap son majorité, si so moun-la i kont touzour déssi papa-momon pou li fé son parkour dan la vi ? Konm — alon donn dé-troi légzanp — fé son ménaz, gingn son sosso, an avoir son kaz, grandi son bann zanfan. Si pou sa, li baz touzour déssi la famiy, demoun lé riskab dir li la pa in moun bien désalé, otonome, par l’fète, é moin lé sir, lé riskab l’antouraj na poin in bon konsidérasyon pou li. Sa lé vré ossi pou in péi, pou in réjyon, pou in lil konm La Rényon. Dann ka-la, nou na in bann kouzin k’i èm anou bien épi k’i konsidèr anou konm asisté. Zot i rapèl sa ? La pa bézoin mète ankor lo poin déssi lo "i" !*

Donk, in pé i domann pou kossa nout parti, li lé apré fé plan déssi plan pou dévlop La Rényon. Zot i pans lé pa nésésèr kass son tète konmsa. Démyé baz déssi la mèr patri épi l’Erop plito ké kont déssi son prop fors an promyé. Nana mèm in pé i di, i vo myé baz déssi lo program bann parti la mèr-tropol. Pou zot, sa lé pli fasil, konmsa si na in projé mèr-tropolitin, klik ! ni gliss anou dédan épi ni bénéfisyé otomatikman lo zafèr. D’in sèrtin sans, zot na poin tor konplètman, mé zot na poin non pli rézon konplètman.
In légzanp, si gouvèrnman la Frans i déside fé in gran l’anprétaj larjan pou dévlop la roshèrch, sré bète pou nou dir sa in intérèss pa nou, ni profèr débrouye nout kari par nou-mèm pars ni pini anou initil, ni pini ossi La Rényon épi bann Rényoné. Astèr, si nou ossi nou na bon zidé par nou-mèm, konm fé in konpagni l’aviyon (zot i suiv amoin in pé ?) sansa in konpagni bato pou transport marshandiz dann l’oséan Indien, la pa pars la-ba gouvèrnman la Frans la pa mark sa dann son program ké ni doi pa fèr.

Donk, final de kont, si mi rovien in pé déssi nout késtyonn plan réjyonal nout dévlopman, sanm pou moin li lé bien nésésèr, mèm si i fo ni rogard bien sak banna i vé fé dan la Frans, konmsa sa i pé ansèrv anou in pé bien. Avèk sak banna i fé d’bien la-ba, épi nout prop plan dévlopman, ni pé ansort anou myé, pli vite é sirtou ansort anou pou vréman.

* I fo dir, solon li, sé lo prézidan la Frans k’i pans sa d’nou.

Justin


Kanalreunion.com