Oté

Pou ramène a li la réalité !

Justin / 19 octob 2011

Matant Zélida la ékrir Justin :
Mon shèr nové, mon spès salté,
Si mi konpran bien, dann la gosh-la, zot lé divizé konm konféti. Dabor inn, nana plizyèr parti, épi shakinn lé divizé an dé, troi ou bien kat... Arzout èk sa, konm si sa té i sifi pa, zot la fé ankor in kantité z’asosyasion, bien antandi divizé rant zot. Fransh vérité, kan mi rogard azot apré soubate konm dann panyé krab, moin lé kontan ète dan la droite. Biensir, mon nové ! Moin la antann mésyé Anette apré di, avèk bann primèr, i sava shanj l’ékilib dan la gosh. Sa i vé dir, son parti i vé pran promyé plas an parmi bann mouvman la gosh épi pass kalpyé bann rouj-de-fon. Solon moin, soir-la, bann rouj-de-fon, sirman, la tète la fé mal. Pou kosa ? Pars ou i koné, kan ou i dsann la, kan ou i afayi la, ou i koné pa ousa ou va rété. Konm Daniel Vabois té i di dann in zistoir : "Ou i dsann ! Ou i dsann ! Ou i dsann ! Ou i ariv o-fon !". Tok, pran sa pou toi !

Justin la fé pou répons :
Mon vyé matant k’i koz touzour la boush rouvèr,
Moin la fine di aou, in bonpé foi, l’inyon sé la lite. Nout parti, son politik sé in politik l’inyon. Pou kosa ? Pars oplis nou sar nonbré, oplis nou v’ariv fé késhoz pou nout péi ; San l’inyon, nou nora pa gingn La Rényon départman fransé. San l’inyon, nou nora pa gingn l’égalité. San l’inyon, nou nora pa gingn bate la frode éléktoral atèr. Nana ankor in bonpé konba nou nora pa gagné si nou té i fé pa sa dann l’inyon. Donk l’inyon sé in l’obligasyon pou nou ! Mé si ni fé pa l’inyon, si nou dévir lo do avèk la politik l’inyon, lé riskab trouv inn-dé partnèr va manz grinn zak nou la tir dann fé. Donk i fo ni avèy sa konm lé dsi l’fé, é sé sa ni fé. Mé oplis nou sar nonbré épi bien roganizé, oplis nou sar armé pou fé réspèk anou, é pou arpous sak i voudré marsh dsi nout pyé. Astèr ou i di amoin, nou lé divizé, mi di pa ou na tor, mé pou moin, i pé pa fé in n’ot tik-tak ké sa. Astèr, i fo sak i aplik pa bien lo politik l’inyon i fo li atann ali gingn, pa zordi, pa domin, in bon kou d’zok bien mérité... Pou ramène al i la réalité.

Justin


Kanalreunion.com