Oté

Pou shwazi odrémié awar in pé mémwar !

Justin / 26 mars 2015

Sak lé sir séké dimansh proshin néna 25 binonm éli pou lo lasanblé départmantal la Rényon. Sak lé sir osi séké nora 25 fanm èk 25 bononm, tamié. Promié fwa néna otan fanm konm otan bononm dann in lasanblé la ba déor konm isi. Dopi lo 6 zwin 2000, dopi lèrk la lwa lé sorti boudikont, la lwa si la parité, zordi i obliz déza an awar otan lin é lot.I komans zordi pou lo lasanblé départmantal é va kontinié konm sa ziskatan va nyabou fé la parité pou tout mi sipoz. Konm i di « shomin gran-bwa sa lé long ti pa-ti pa narivé »In késtyon sipèr-banko, kissa la mèt la lwa la dobout ?

La pa la drwat sirman, rogard solman la dat 6 zwin 2000, kissa té an plass an zwin 2000, gouvérman la gosh, gouvérman Jospin. Zot i pé kont dosi, a shak fwa néna in mézir progrésiss, a shak fwa sé la gosh son tousèl. Souvan-dé-fwa nou néna a rodir si la politik bann sosialiss, konbyin d’fwa banna i ral a nou dèrièr, i vann a nou biftèk shoval pou biftèk bèf, i gingn pi konté lo nonm do fwa, nou lé abitié èk banna mé zordi ni dwa rokonèt sak lé bon, sak lé mové pou nou, sanm pou mwin la lwa si la parité sé in bon lavansé pou nou.

Néna i di la dwat èk la gosh minm dogré. Ziska zordi ni pé pa di sa, rogard solman dopi 1981, mi pé pa grinn tout bann mézir sosial dopi tan la, tanzantan navé la drwat, tanzantan navé la gosh kisa la fé plis mézir sosial ? Sanm pou mwin si i mèt si in balanss mi paryè balans i pansh si koté gosh touzour. Tanzaot lé bon an awar in pé mémwar. Momandoné ni pé tonm dovan difikilté pou fé in shwa mé tanzaot lé bon awar in pé mémwar !


Kanalreunion.com