Oté

Poukoué la pa fé dopi lontan ?

Justin / 17 séptanm 2015

Ziska mwa désanm anon prépar la fèt ! Konm nout tout i koné, astèr nou na pi lo drwa pa konèt, na pi sogré pou pèrsonn, vik tout i an parl, zournal, radio, télé, minm zournal perkal. Si na inn ti ginn domoun i koné pa, zordi ni anons a zot mwa désanm na zéléksyon rézyonal. Lo 6 èk lo 13 désanm ékzaktoman. Lé vré pou vréman dopi lontan nou na soupson, si kisa i sar fé èk kisa. Intèl èk intèl, lot tèl èk lot tèl. Ni koné plizoumwin ki lé èk ki. Lo bal lé rouvèr.

Konm mwa désanm sé osi la fèt pou prépar ti-noèl, antansyon néna i pé profit pou mélanz lé dé, zéléksyon èk ti noèl. Konm di mon dalon néna i pé fé prann a nou la bouzi pou makaroni. Mi antan déza bann kandida i komans fé promès kado. In madam kandidat i promèt déza 30000 anplwa toudinkou. Koman i fé ? I di pa. Néna i promèt déza la plass travay minm si léta i di konm sa na tro fonksyonèr, i promèt zis pou dégoté. Na pwin program mé néna promès.

Poitan ni wa tou lé zour difikilté bann zéli, bann mèr pou réponn problinm travay. Sominn dérnyèr ankor bann marmay kasèrn la boush la rout zis pou gingn inn ti lanplwa édé. Bann zéli, bann mèr i zoué la d’si, i zoué d’si la mizèr domoun boudikont. Mwa désanm i pé èt in bon lokazyon pou fé la fèt pou vréman, mé anon pa tro krwar pèr noèl é ankor mwin mèr noèl. 30000 anplwa toudinkou, lé pa inn ti marmay lékol lé éné yèr i promèt sa. In moun néna 40 an dann la politik li di. Poukoué la pa fé dopi lontan ?



Inn modékri, inn ti lavi, inn komantèr ?



Bann modékri andann forom






  • Kan bann zintéré kontrèr i affront , anté lo pataz dé rishès è lo profi personèl, lé pa fassil dégaz in voi pou lanplaw. é padsi lo mashé kan, ester , sertin i oz pi romet an koz lo konfor étably paské zot i trouv zot konte osi ladan avek zaranzman pa si, pa là. sa sé in promié lidé
    ladministratyion la pa souvan li kompran lo bann domoun la pou lité pou li gingn in kontra, si na mié i pran osi ! é la sé in langaz do sour kom i di ; lé vré sak la zamé été kronté à tel sityation, pou zot so zesplikation lé loin.sa sé dézièm lidée.

    Pou fini mwin di , na lo komba politik pou dégaz in voi ziste é akseptab pou sov out dignité, fasse à lékonomi kapitalis ké lé pala avek ou, apré kombat pouké ladministrasyion i kompran out galér, paské i ariv kan lo politik la mett lo bidzé pou soulaz la mizer, kré in sertin nomb d’anplaw, pafoi i di a ou nou koné pa la enkor ariv lo désizion dann zaministratyion, là ou attand, ou pri pouké out soufrans lé soulazé, lo désiziion i ariv,
    donk la batay pou lanplaw i fo nou oz à tou lé nivo dintervantyion, pou akséléré , véyé kan lo mezir lé desidé li lé apliké rapidman

    Article
    Inn modékri, inn ti lavi, inn komantèr ?


Kanalreunion.com