Oté

Poul i shante avan, mé i ponn rarman !

Dann péi méssyé Didier :

Justin / 20 novembre 2010

Kisa la di, dévlopman La Rényon i intérès pa méssyé Didier Robert ? Sirman in moun i vé pa oir la vérité an fas. Pars moin na l’inprésyon, kozman-la la pa vré. Mèm ké dann in zournal pou moun byin, vi k’sé in gran journal la Droite, moin la lir méssyé Didier i rogard avèk admirasyon lo dévlopman l’Australie. Mi évite azot ankor lo zyé d’vélour li nana pou péi-la.

Mé akoz l’Australie ?
Mi pans pa lé dé sityasion lé parèy ; L’Australie sé kaziman in kontinan é La Rényon in pti galé dann l’oséan indyin. L’Australie nana toute sorte mineré dann son sou-sol, é nou la poin tousa. L’Australie i fé vnir d’moun friké déssi son téritoir, é nou, so bann moun-la lé pli préssé alé dann in suite l’il Maurice plito k’vénir issi. Arzoute èk sa, l’Australie lé indépandan, li komann son kor, nou lé kant mèm ankor in pé kolonizé.

Bin alor, kou k’i ral méssyé Didier la-ba ?
Pétète pars toute bann péi rish i ral ali ? Somanké, in pé la fine pansé, la-ba sé in péi l’Eldorado. Konm di la shanson Hugues Aufray, « i trouv lor dann fon bann ruisso, va ramène issi in bonpé lingo ! ». Pétète ? Mé la-ba, lé pa konmsa. La-ba, i fo an avoir pou gagné. I rossoi pa demoun o-flan la-ba ! Somanké, ali èk son bann nana lo pognon é i rèv gonf ankor zot pla. Donk la pa dévlopman La Rényon i intérèss azot, mé plito dévlopman pourkoi zot nana. Romark, mi arpète sak demoun i di ; Pa plis, pa moins, mé pétète demoun i pé an avoir rézon. Akoz pa ?

Touléka, apré sak li la fé la-ba dann Adélaide, mi pans sar dir pou li ardone ali in l’èr d’virjinité. La-ba, i èm pa demoun i rakont la krak. La-ba, d’apré sak mi koné, lé pa konm déssèrtin landroi. Poul i ponn dabor épi i shante apré. Dann nouvo Konsèy réjyonal, poul i shante, mé i ponn rarman. In gran nians !

Justin


Kanalreunion.com