Oté

Pourvik ni konpran a nou !

Justin / 21 zanvié 2016

Mi antan tro d’moun ankor zordi i poz késtyon, si ni dwa koz kréol kan ni rant dann biro, kiswa biro zinpo, biro la séki, biro lékol, ousinonsa dot biro ankor, konm si pou désertin in moun an pozisyon i dwa pa koz kréol, proférabloman li dwa mèt la poz, mèt lo fion, é boudikont in moun i kozré kréol li tonm diminié. Déza tanm-ti minm, la plipar d-nou té abitié antan momon èk papa lans lo promié son, a mwins sak lé éné èk la ot. Mé sanm pou mwin néna tré pé.

Aprésa, kant nou la rant lékol, aprésa la di a nou konm sa sak i éspass la kaz i èspas la kaz, sak i éspass lékol i éspas lékol, konm sik banna té i vé mont inn kont lot, in manièr di a nou dék ni rant dan la kour ni fèrm nout také. Mazinn in pé, sa in travay lé rèd pou in marmay, mi an souvyin minm dèkin marmay té i koz kréol, é sa té i ariv souvan dé fwa, konm i di lo natirèl té i rovyin o galo, lo marmay té pini. Talèr sinkant an pli tar, nou lé minm topo ?

Néna la ba déor i mank pa fé valwar zot lang, bann kors, bann bréton, bann bask, na pwin lontan lo prézidan la rézyon kors la donn inn ti son. Kosté èk nou la minm, nout bann kouzin morisyin, tout i mèt ansanm, domoun a ou, zournal a ou, minis a ou. Sirtou arèt di a nou, kan i koz kréol i déranz lo fransé, pou mwin inn i dalonn èk lot. Alors dann biro, sak i vé koz kréol i koz kréol, sak i vé koz fransé i koz fransé, pourvik ni konpran a nou !


Kanalreunion.com