Oté

Pouvoir èk larzan
K’i bate di bèr lish son doi !

Justin / 28 septembre 2010

L’idéal, kan ou nana in sèrtin pouvoir, sé vréman lo réspé pou l’intéré zénéral, épi sirtou fé pa d’konfizyon rant l’intéré zénéral épi l’intéré partikilyé. L’idéal épi lo droi li-mèm, pars lo kode pénal i kondane in n’afèr konmsa. I apèl sa linzérans, é sa sé in déli. Mé rant lo droi épi son l’aplikasyon, nana souvan-dé foi in diférans.

Lo tan la frode éléktoral :
Lo tan la frode éléktoral a-gogo la fine passé pou l’instan. Dann tan-la, la frode éléktoral, la vyolans bann nèrvis, détournman bann fon piblik, sa lété pa otorizé par la loi, sa lété kondanab, poitan té i kondane pa bann frodèr, bann nèrvis, bann profitèr, myé, té i karèss azot dann sans di poil, té i mète azot dan l’onèr. Zot lété in pé lo bann shovalyé blan la défans la France.

Ladi-lafé kréol
Alor, pou kossa zot noré priv azot gonf zot pla ? Ladi-lafé kréol té i roul ron. I di, inn té i gingn in kaz san ashté, l’ote té i trouv in loto dovan son porte, la klé dsi, lo papyé an son nom. Moun o-flan té i fé gran-gran kaz, té i roul dann gran loto. I di mèm, in pé té i plass larzan sal dann péi la Suisse. Sa na in bon koup de tan, mé pétète déssèrtin i pé ankor lèss azot tanté par luil tantan.

Konm di lo konte : « K’i bate di bèr lish son doi ! ».

Justin


Kanalreunion.com