Oté

Pran mon golèt la pèsh mon gaté !

Justin / 18 out 2015

Lo tan zinpo larivé, fo pa tardé pou yangé i di. Mi pèy pa zot po krwar, ala mi vyinn aprann in afèr, i prétan èk nout présidan aktièl bann moun rish i pèy ankor mwin zinpo kavan. An souvyin a zot sat avan, lo prézidan avan la fé lo bouklié fiscal pou moun ézé é i prétan zordi lo sistinm lé ankor pli favorab pou zot. Boudikont lo shanzman sé mintnan promi pou zordi lé mantèr. Konm di in shantèz la rènyon byin koni “Sak néna, néna touzour pou gaté, sak na pwin i rèt la gèl rouvèr“.

Zournal déor i port an so moman “Lo plafonnman ISF zordi i kout pli shèr ké lo bouklié fiscal yèr“. 2014 i prétan lo zinpo la rann banna 1 miliar leuro. Kisa noré di kont fé. Lané davan la donn 700 million, sèt ané la goumant o mwin 30 pour san. Lé vré pou vréman i konsèrn pa nou ti kolon an ba, mé an minm tan i di konm sa larzan lé kourt, bann koléktivité i dwa sèr sintir, kont pi si la dotasyon léta, an sort a zot konm i pé, zot minm, éksétéra la ké lo ra. Léta lé touzour larz èk bann rish.

D’si ki ni pé konté nou ti kolon ? Momandoné ni vot kont la dwat, i argard pa nou, momandoné ni vot pou la gosh i sanfout d’nou. Ki pé pèy zinpo sinon moun rish ? Aprésa étonn pa nou si néna i di konm sa “tout lé parèy“. Aprésa étonn pa nou si néna i di “si lé konm sa mi rét mon kaz“. Olièrk alé voté, pétèt oila poukoué néna i shant “Pran… mon golèt la pèsh mon gaté…… !


Kanalreunion.com