Oté

« Pran pa la bonté pou l’obligasyon ! »

In kozman pou la rout

Justin / 19 out 2016

Konbien foi moin la antann kozman-la, dann mon vi ? Moin la poin l’éstatistik, mé moin lé sir k’sé in ta plis in paké. Kosa sa i vé dir ozis ? Mi pans i vé dir la bonté sé in shoi d’in pèrsone k’i vé rann sèrvis lé z’ot, kisoi an donan kékshoz, kisoi an donan kou d’min. Biensir sa lé pa obligatoir pars nana dé shoz lé randi obligatoir par la loi, sinonsa sé in l’obligasyon moral : zanfan i doi z’ède z’ot paran kan lé nésésèr, lo paran i doi z’ède son z’anfan si sèt-la lé mal anbéké dan la vi... Astèr si lé pa obligatoir sé lo shoi d’la pèrsone. Kansa i di sa ? Kan ou na l’inprésyoon demoun i abuz dsi ou ! Nout tout, mi pans la fine ète dann in ka konmsa, pétète galman nou l’abiz dsi in moun dann nout vi. I di abizé (la pèrsone kélk’in i abiz dosi), i di osi abizèr (le moun i abiz). Inn i sava pa san l’ot. Astèr mi lès azot trankil pars i f opa abiz dsi z’ot tan. Alé ! Ni artrouv pli d’van.


Kanalreunion.com