Oté

Pran sa pou la valèr !

Justin / 10 novanm 2009

Kan in n’afèr lé fini, i oi inn bann la pa okip dé riyin i débark, i sava asiz dann éstidyo télé, sinonsa dann radyo, konm k’i diré pou arkomans lo sobatkoz... In légzanp ? Zéta- zénéro i sorte fini sa... Mèm ! Lo Prézidan la fine komans tir son konklizyon. Lé vré, in kozman sé in kozman, in l’oryantasyon sé in loryantasyon, i rèss pou transform sa an proze, byin klèr, byin nète, si possib byin bon pou nout l’avnir...
Dizon, demoun lé lib z’ot lang, mé i fo kan mèm tourn sa sète foi dann son boush avann kozé : si ou l’avé poin aryin pou propozé pandan lo sobatkoz, konm in pé, ou lé mal plassé pou bate tanbour pou sa ou byin kont sa. Pars oute batman tanbour i aporte pa aryin, i fé pa avans aryin, i anpèsh pa aryin arivé.
In pé i di : « Lé byin bon ! », é mi pans zot lé pa vréman o-kouran, kansréti zot lé péyé pou sa. Mi antann dir Didier Robert, mèr épi dépité, lo boug la pa fé lo débi di komansman d’in domi propozissyon... i bate la min ! Kossa i vo in batmann-min konmsa ? Sa i vo pa aryin, pars kan in moun i di oui de boush, la plipar d’tan, li di non avèk lo kèr, sansa li lé pa la èk sa, li s’anfou d’sa... Donk i fo pran sa pou la valèr !

Justin


Kanalreunion.com