Oté

Primèr, sa oui !
Dizon mèm primitif !

Justin / 1er octobre 2009

Matante Zélida la ékrir Justin :
Abon ! Alala k’in bon fransé d’Frans la vni pou koriz in pé lo rin bann rouj-de-fon ! La moin la ri la ! La moin lété kontan ! Kossa ? Ou la pa rogard Antène Rényon don ? Mi pé assir aou ou la mank in n’afèr : méssyé Raoute la mète de boi avèk in pé. La, la mète la ! Li la di : lo tribinal la sanksyone madam Bello la roprézantant lo parti madam Buffet k’i fé mèm pa dé pou san dann zéléksyon an Frans. Li la di ankor konmsa i fo pa dimansh o soir i rès troi péi kominis : Kiba, La Coré di nor épi Sin-Pol. Pran sa pou zot !

Justin la fé pou répons :
Mon vyé matant k’i koz touzour la boush rouvèr, la pa kan ou i anfil in shaplé mansonz inn déyèr l’ote ké ou i di lo komansman d’in boute la vérité. La pa kan ou i tiliz bann vyé zarguiman fatigué avèk lo tan ké ou i gingn lo kèr bann zéléktèr rényoné. Moin pèrsonèl, moin la pans l’UMP la révèy in réskapé la Guèr froide té i dor dann formol, é konm li té i koné pa lo tan Makartir té fine passé, li la larg sak li té i rèss ankor dann son tète formolé. Pou konplète lo tablo, ala k’li di li-mèm li sé in antikominis primèr... Antikominis, mi koné pa sak li vé dir par la, mé primèr, sa oui ! Dizon mèm primitif.

Justin

NB : Sak i gingn alé déssi lo site Antène rényon, zot va rann azot kont par zot mèm kossa in boug i pans sirman li fé parti l’élite la Frans lé kapab dir dann in télé zanr kane-koush-a-tèr dovan lo pouvoir la Droite.


Kanalreunion.com