Oté

Problèm kann : in pé lo rin lé soupl kan mèm la di !

Courrier des lecteurs de Témoignages / 30 mé 2016

Mé z’ami, m syé Sarkozy i sort pass La Rényon é konm zot la lir dann nout zournal Témoignages lo promyé z’afèr li la anparlé sé plantasyon kann dann la Rényon. Pars i paré bononm-l a i koné na in grav ménas dsi la kane La Rényon. Dopi ké ni kriy dann dézèr, pèrsone i antan pa nout kriyé, mé zordi k’in gouyav de frans i pass, ala ké tout suit toulmoun i rann azot kont.

Promyé moun : Zan-Pol Virapoullé. Lé déza tan ké li rann ali kont par li mèm. Pou koué mi di sa ? Pars l’ané 1969 sé kant mèm li ké la pik in kouto dann do plantèr. Koman ? Sinploman kan li la pans na arienk lo sik k’i intérès a nou. La bagas ? Nyèt ! la Mélas ? Nyèt ! La biomas ? Zéro kalbas ! Plis in santène ko-produi kann sa li la pa pansé ditou. Poitan doktèr Raymond vergès l’avé majine sa dopi lé z’ané 50 par-la. Virapoullé : in om d’avan-gard pou mète in boulé èk nout pyé pou anfons anou dann basinn-lo.

Kisa nou la vi ankor la-ba ? Bann sindika plantèr. Mi di pa té i falé pa alé, mé mi di sirtou dopi dé z’ané, zot osi zot laté fine obliy sa. Inn-dé dat : l’ané 2005 kan la fé lo votaz pou la konstitisyon éropéène, l’erop l’avé anparl siprime lo bann korta épi lo pri garanti. Donk té pa dir pou konète lo l’anboulkidi té i sa tonm dsi nou. L’ané 2012, mésyé Le Foll la pa trouv in térin l’antant avèk lé z’ot péi l’erop ? Kan lo parlman la désid prolonz lo kota zisk’a l’ané 2020, ala ké li la aksèp l’ané 2017. Na tro pou di é konm di lo kont na poin pli sour ké sak i vé pa antann.

Mé oila ké lo pti om i ariv é mèm ké li la pa bouzé dopi 2007-2012, ala k’in pé i sava prostèrn azot dovan li... zot rin lé soupl kan mèm la di !


Kanalreunion.com