Oté

Promès in pé, sé promès rakyé ! Sa lé byin vré !

Justin / 26 out 2009

Kan in moun la boir la rak, li fé aryink di bétiz. Li fé galman la kouyonade. Arzout èk sa, li gingn pa fé réspèkt ali vi k’li pèrd kontrol déssi li-mèm. Épi z’apré, kan li la fine désoulé, kan son luil la fine fane in pé, li promète li boir ar pi zamé. Mé son promès, sé in promès an l’èr, vi k’li vyin pa bou réspèkté. Alor demoun i di, sa in promès de rakyé.
Pou kossa mi an parl dé sa ? Pétète pars sa i fé pans amoin in pé l’aktyalité. Non ? Bin poitan oui ! Zot i souvyin bann réstoratèr, kan zot la domann diminyé la TVA pou fé bès lo pri bann ropa, pou anbosh bann jènn, épi pou rofé in pé z’ot kont la bank. Lo pti bononm k’i ansèrv anou konm prézidan la pran son baton, la parti oir inn, la parti oir l’ot, la pass la min dann do in pé, mèm la fé bizou bann madam. La pa manké, la diminyé la TVA, pa inm’ti pé, mé in bon pé. Kossa l’arivé ? La près pa diminyé bann pri, la près pa anbosh demoun, la gonf z’ot pla.
Bann bankyé, pou z’ot par, apré an avoir zoué zé d’loto avèk larzan la pa z’ot, la kri o sokour. Lo pti bononm la di prézan, épi li la alonz kèk milyar l’ero, apré an avoir promète arète zoué kart rouz-kart noir avèk larzan, arète lès bann trédèr zoué la bours an fou-fou, épi déblok in pé bann pré konmsa lékonomi i ro-démar. Oui, mé kan bo-tan l’arivé, banna la oubli lo mové zour, épi zot la déréspèk z’ot parol. Alor, promès sé dète ? Oui, byin sir, mé pa pou déssèrtin prométèr. I di pa gran prométèr, pti donèr ? I di ossi, promès in pé, sé promès rakyé ! Sa lé byin vré.

Justin


Lésplikasyon inn-dé pti mo :

In rakyé sé in bivèr d’rak.
Promès rakyé : promesse d’ivrogne.
Luil la fine fané : la fine désoulé.
Prométèr : in moun i promète.
Kart noir-kart rouz : in pé té i zoué sa dovan la gar Sinni.
Déréspèk : i réspèk pa.
Déplanté : arashé.


Kanalreunion.com