Oté

Promès na poin lo frin !
Mé la pasyans demoun nana son boute !

Justin / 12 février 2011

Na in patoi i di konmsa : "Promès sé dète !". Na in n’ot i di plito, promès i angaz arienk sak i kroi pa sak i fé. Sa i vé dir kossa ? Sa i vé dir, par ébzanp, La Réjyon va fé voiyaz demoun pou moins sink san éro, alé épi rotour, Rényon-la France é la France-Rényon. Oui, mé bann konpagni l’aviyon i konpran pa lé shoz konmsa. Zot i konpran i fo goumant lo pri pou fé plis profi san arbès lo pri lo biyé.
I pé promète ossi distribyé l’ordinatèr avèk in bon sink san éro. Sak nana déza la pa bézoin sa, é sak la poin i kontant azot in l’ordinatèr bass kapasité, bridé é tou. Mé lo bann vandèr i kalkil solman la fasson fé bénéfis, é si mi tronp pa, sé sa zot la fé. Astèr, sanm pou moin, zot l’apré rabès lo pri inn foi ké zot la fine fé zot plote ;
I pé promète galman in route litoral sis voi, san savoir si i pé fé in n’afèr konmsa ; san savoir ossi si demoun va gingn ankor sirkil dann Sin-Dni. Myé ksa, i koné pa si la prévoir la kantité larzan k’i fo, pars avèk 1,6 milyar l’éro é lo pri ké lé shoz i koute, la pa sir i sava bien loin. Arzout èk sa, i pé promète dé mil bus sirtou si sé pa ou k’va mète sa an sirkilasyon. Konm di lo patoi : « Sak i done la rou i ral pa sharète ! ».
I pé promète ankor in nouvo route rant Sin-Pyèr épi Sin-Bénoi, fé vni sisan mil touris, fé anbosh kat mil pèrsone dann transpor é dann tourism, mé san avoir in l’idé sak i fo fé pou sa. Promès na poin lo frin sa ! Mé la pasyans demoun nana son boute !

Justin


Kanalreunion.com