Oté

Promès sé dète ! Si ou i tienbo pa ou sé in marshann parol !

Justin / 21 séptanm 2015

Toulmoun i koné shomaz l’apré fatig kréol in poin inkroiyab. Fir-a-mézir nana plizanpli d’moun an bon éta pou travay I tonm dann so tablatir-la. Sa in n’afèr i diminyé out kouraz, i aplati out porte-moné, i fé fash aou avèk out famiy ; i fé mal consider aou par la sosyété. Dizon sé lo uityèm plé l’ézipt.

Alor lé tro fasil abizé : in pé i fé travay demoun ann dsou d’lo pri, i déklar pa la totalité sak ou i fé la sékiriyé. Arzout èk sa i fé mont aou, épi dsann, é pi romonté pol anploi pou pa trouv arien kansréti mèm in pti kontra. In pé bann mèr, kan i ariv zéléksyon i donn aou kontra, inn-dé moi apré i kas sa konm si riyin n’été, épi alé fé marsh lo droi si ou i gingn. La pa z’ot traka ! La pa lo traka d’sisya konm in pé d’ moun i di.

Zéléksyon réjyonal i ariv. In kandida i di li va fé vin mil plas travay ! In n’ot – sa in madam sa !- i di li va fé trant mil plas travay. Akoz pa karant mil. Akoz pa plis ? Akoz pa lo plin anploi. Koman i fé sa ? Avèk kèl l’arzan ? Kisa k’i fé sa ? I pran pa la pène di aou kosa-kisa-kansa. Promès i vol ba ! Tro ba mèm pars toulmoun i koné shomaz lé riskab goumanté plito ké diminyé si i kontinyé avèk lo mèm métod. Konm i di : lo mèm koz i donn souvan lo mèm rézilta.

Mé, konm i di, promès sé dète ! Si ou i tienbo pa ou sé in marshann parol ! Ni plis, ni moins !


Kanalreunion.com