Oté

Pti pyé vaniy i fé dann laboratoir

Justin / 28 out 2015

Mi koné pa si konm moin zot la gingn la shans rogard in zémisyon dann télé I port dsi bann nouvo téknik. Dann so z’émisyon-la, i parl souvan dé foi bann problèm la roshèrch-dévlopman. Si ou lé in pé kiryé dé shoz, forséman sa i intérès aou. Si ou i s’anfoutsa, forséman konmm di lo kont koz aou, koz pa ou, domin out fète.

Dann lo l’émisyon moin la vi té i amontr koman i fé in pyé la vaniy, dann in la boratoir. Zot i koné koman i plant la vaniy isi La Rényon ? Zot i koné i pran in boutir, i mète ali dann in bone tèr, bien rish avèk téro, i aroz bien é si ou na bone min ou na la shans ké lo boutir i pous. Défoi i pous, défoi i pous pa. Ou i sava pa rode pli loin k’sa… Sof ké na in pé i réisi san pour san fé pous z’ot boutir é an plis ké sa zot i vienbou protèz z’ot nouvo pyé kont bann mikrob, bann shanpignon é tout lo tablatir bann plant i ramass koméla.

Donk moin la vi banna travay dann in laboratoir pou fé bann pti pyé la vanille. Kan la fine fé, i mète sa dann in tib épi i vann ali : lo pyé lé fine pran, dann bon kondisyon é ou i pé plant ali san trakasé pars pou pousé li va pousé. Sof ké i fo ou nana in bon moné sansa rode in boutir é fé konm bann z’ansien la amontr anou.
La pa tousa, mé lé touzour intérésan kan i fé dé shoz konmsa… Malérèzman na pi bonpé la vaniy koméla é lo bann zoli pti pyé na plis la shans artrouv azot dann in zardin demoun na lo pourkoi ké dan in karo in plantèr. Plis konm in plézir ké konm in bon n’afèr par raport nout dévlopman ékonomik.


Kanalreunion.com