Oté

« Pti pyédboi, zèrb lé gran ! Gran pyé d’boi, zèrb lé pti ! »

In kozman pou la rout

Justin / 27 octob 2016

Sans prop ? La pa bézoin fé in désin pou konprann si solman ou i rogard in pé bien la natir. Mé lo sans figiré, sète-la nana pou diskité. Dizon kan nana in bonpé dmoun in pé parèy, shakinn son talan biensir mé na poin inn i touf lé z’ot. Rézilta : shakinn i trouv son plas é la sosyété i viv myé an armoni. Mé si dann la bann nan a inn i kraz lé z’ot ? Si li anpèsh lé z’ot trouv, konm i di, z’ot plas dann solèy ? L’èr-la lé pa késtyonn l’armoni, lé pa késtyonn l’ékilib. L’èr-la, toulmoun i trouv pa z’ot plas : na inn sansa inn-dé i pran tout la plas pou zot é lé z’ot na zis in plas pou rakokiyé. Antansyon dann in ka konmsa : sé pa l’intélizans épi la konpétans k’i pran pouvoir mé souvan-défoi, lo kontrèrstèr. Alé ! Ni artrouv pli loin sipétadyé.


Kanalreunion.com