Oté

Pwatan sé in zéléksyon i dovré konté !

Justin / 17 zanvié 2015

I éspass télman d’shoz dan so mond la, sirtou an so moman, ki fo èt bandé pou vrémann, pou byin konprann lo tik-tak. La kantité zinformasyon ni roswa, i ariv an poundiak baya, kiswa sad isi kiswa zaktialité déor. Tousala fo byin pran lo tan pou dizéré, fo fé in bon triyaz, sirtou alé pa rant andan la an bèf, san ésèy konprann ou riskab rosort an stèk si ou nyabou pa soupézé, sirtou avan kozé tourn nout lang trant fwa dan nout boush, sinonsa i pé ariv malèr. Konbyin la rèt atèr pa rapor zot la koz toratravèr ? Dopi in tan ni antann tout zafèr, ni antann télman, in kou an frans, in kou an bélgik, in kou an almagn.I arèt pi.

I bonbard a nou si tan télman zinformasyon talèr sak lé prosh dé nou la minm ni gingn pi an sousié. Poukoué mi di sa ? Ki koné dann dé mwa néna zéléksyon ? Konm si lo mo té doné pou pa kozé. Poitan, dann dé mwa néna pou vréman zéléksyon départmantal partou an franss, lo vinn dé é lo vinn nèf mars, donkalor dann dé mwa, la d’si ti wa pa in fèy bouzé ti antan pa domoun kozé. Poitan sé in zéléksyon inportan pou nou pa rapor tousala problèm nou néna. Sanm pou mwin sé lo moman mèt tout si la tab, la shèrté d’la vi, ropoz lo problèm nout résponsabilité pou diriz nout péi par nou minm.

Koman kalbit bann zinégalité rantronou ? Kouéksé nou dan nout péi ? Nout léstati ? Kosa ni fé pou lanplwa ? Koman ni règ problèm la kaz pou domoun ? Pou bann pov kosa ni fé ? Kosa ni propoz nout zénèss pou domin ? Zot i wa, néna travay pou fé. Minm si ni koné pa tro kosa lo nouvo lasanblé va fé, ziska ou i sava son konpétanss ? Zordi ankor ni gnor tout dé tousa, mé kèlkéswa sad zot va mèt dodan, pourvik ni trouv mwayin ansanm sa pou dévlopp nou minm nout péi. Pwatan sé in zéléksyon i dovré konté !


Kanalreunion.com