Oté

« Pyé d’boi i tonm koté li pansh »

In kozman pou la rout

Justin / 17 zwin 2016

Mi pans, konm moin, zot la fine oir, é sirman pa rienk in kou, in gran pyé d’boi, frapé par la mortalité, tonbé an travèr d’shomin. Kisoi pars demoun la koup ali, kisoi pars lo van for la baté ali atèr. Pou mon par, sa la touzour fé dsi moin in for l’inprésyon . L’inprésyon ké son l’èr té arivé é li la tonm atèr koté li téi pansh..Bann koupèr pyé d’boi i di souvan i fo dovine par avans kèl koté lo pyé d’boi va tonbé pou pa rès pri dosou…La, nou lé dann sans prop, mé dann sans figiré :pou la sosyété par ébzanp ? Si ou na in mové panshan, sé dann sans-la ké v’ariv aou dézagréman konm par égzanp demoun i ème lo zé, sé lo zé mèm va bate azot atèr.Domoun volaz, sé z’ot volazité ké va fé tonm azot.Demoun parès, sé la parès va domine azot. « La kord i pète koté li lé faye » : sa in provèrb lé aproshan sak ni sort oir é in rokomandasyon :port atansyon out poin fèb.Sé li mèm ké ou i doi an avoir pèr .Alé ! ni rotrouv pli d’van ! 


Kanalreunion.com