Oté

« Pyé z’épine i arash étan pti ! »

In kozman pou la rout

Justin / 2 out 2016

Ala in bon kozman mé konm mi sa di azot nana lo « pour » épi nana « lo kont » pars konm i di souvan tout médaye nana son rovèr, nana son fas A k’i apèl « pil » épi son fas B, k’i apèl « fas ». Si pil i vé k’i détrui, fas i vé k’i konsèrv. Si i pouvé, étan pti, prévoir tout lé movèz shoz ké désèrtin i fré dann z’ot vi i fodré rash lo kèr konm rash lo kèr in pyé pagot. Mé d’abor lé pa posib prévoir, épizapré kisa k’i pé vréman ziz in moun pou sak li la fé dann son vi ? Zot i koné, nana demoun i mène in vi soidizan an tout inosans épi dann la réalité zot l’avé boudikont plis lo vis ké l’izine Bo-fon. Astèr si mi di azot bann z’épine konm z’épinar i donn bon tizane, zot lé riskab zir amoin. Mé sak lé vré, lé vré, é sak lé ékri lé ékri : Koshon k’i s’an dédi . Alé ! Ni artrouv pli dvan !


Kanalreunion.com