Oté

Ralé-poussé dann foutbal fransé : konm k’i diré in mové l’èr di tan !

Justin / 2 mai 2011

Dopi dé-troi zour, nana konm in ralé-poussé dann la FFF. Banna la fé in rénion pou diskite déssi l’avnir foutbal fransé é d’apré sak i di l’avé in moun dan la bann la fé lo rozistroman lo bann konvèrasion. Konm l’avé inn-dé kozman téi bote pa li, li la anvoy sa karéman Médiapart, é lo Médiapart la pa rode ki k’i pèrd, ki k’i gingn, la difiz lo z’afèr. Sé l’èr k’tangaz la pété.

Inn la di nana tro demoun koloré dann lékip de Frans épi dann bann formasion. L’ot la di i fo rovoir la manyèr zoué pars na tro bann moun kosto i zoué bobok plito ké fé dé fienk é zoué an finès, dann l’éstil foutbal fransé. Sa la tèlman sokouy bann gran résponsab ké Laurent Blanc té blizé fé in sobatkoz avèk bann zournal, in zanr sirkonférans dé prèss. Solman sak li la di, i aranz pa l’afèr… an kontrèr. Dabor inn, li la anparl bann zouar i pé shoizi zot l’ékip nasional vi ké sa lé dann règloman. I prétan mèm si ou lé fransé, ou i pé zoué dann péi out famiy, mèm out granpèr sansa out gromèr. L’èr-la, lo boug i di, La Frans la fé la formasion pou la po d’patate, la mèm — konm di Michel Admette — nouri lo vèr pou pik son kèr. Aprésa, konm li té an form, ala ké li di i fo pa tro pran bann gran kosto, pars banna i zoué pa assé an finès, épi solon li, bann gran kosto, sa i vé dir bann blak.

Gouvèrnman la domann l’ankète épi la sispann lo diréktèr téknik nasional. In pé la mète a kri konm kabri, mé lo l’ankète i suiv son kouran. Moin pèrsonèl, mi koné pa tro ousa i lé lo problèm. Moin la vi match l’ékip de Frans, sak la gingn la koup di mond, la koup l’Erop épi sak l’ariv dézyèm déyèr l’Italie. moin la pa trouv banna té in bann gro lourdo, té i konète pa driblé épi l’avé in mové tik-tak lo zé. La pa pars la dékoné dépi kék z’ané, konm di l’ot, i fo zète lo bébé avèk lo le bin ! Mi ansouvien in zouar l’afrik i apèl Jorg Wéa ; kan sa té ariv dann sirfas réparasion, bouz aou si ou i gingn tir balon dann son pyé, poitan li té blak, poitan té in gran kosto. Zidane la pa in marmay lékol, é zot i souvien li téi drib bien, li l’avé in bon sans lo zé... li té i done bon kou d’tète ossi. Mé sa sé in n’ot afèr ! Moin la pa antann dir non pli toute bann zouar fransé té i domann pou zoué dann péi étranz, sof inn rant-rant.

Aprésa, in pé i pé dir zot lé pa rasis... zot lé pa non pli kont bann zétranzé. La suite ? Nou va oir, mé moin na konm l’inprésion bann rasis é bann zénofob i inflians in pé bokou bann moun bien. Sé konm k’i diré in mové l’èr di tan !

Justin


Kanalreunion.com