Oté

Rasis dan la kaz ? Sa ni vé pa. L’anbyans dan la kaz ? Sa ni vé bien.

Témoignages.re / 7 févrié 2014

Dopi lontan na in lidé i sirkil in pé partou dann nout péi. Solon so l’idé-la nout sosyété lé pa rasis ditou, é toulmoun i antan bien lé z’inn avèk lé zot. Toulmoun i mélanj inn a l’ot épi sa i donn, konm in pé i di, in bon métisaz. Lé vré ? Lé pa vré ? Lé vré in pti myète, sansa lé pa vré ditou ? Mi pans sa sé in sizé d’sosyété i fo bien étidyé avann an avoir in l’opinyon bien sèryé ; bien tourn sèt foi out lang dann out boush.

Avann alé pli loin, mi rapèl azot in éskétch Fernand Raynaud. La-dan na in kozman i di touzour : "Sal étranzé, ti vien manz do pin bann fransé !". Li di sa in bonpé foi épi néna la shute konm i apèl sa...Lo létranjé i sava in bo zour, fatigé afors gingn kozman é dopi zour-la, dann lo vilaz na pi dopin. Pou kosa sa ?Pars lo ga lété boulanzé...

Alon roparl lo rasis ! Lé vré, an zénéral demoun i batay pa pou in koulèr d’po, pou l’androi ou i sort. Lé vré ! Mé kan ou i antan demoun apré kass dosik dsi la tète bann maoré, sansa bann komorien zordi ankor. Kan i souvien koman bann shinoi lété trété na in bon pé d’tan, kan ou i rapèl sak demoun téi di dsi bann malbar é zordi ankor dsi bann kaf, ou lé blizé romark lo rasis lé pa aboli dann son totalité... Na in n’ot késtyon i port dsi bann zorèy. I pé pa dir banna i ramas pa désèrtin kozman. L’èr-la, ni pé domandé si sa sé in rasis pou vréman. In pé i di sé pa in rasis pou vréman, mé in fasonn fèr konmsi ou yèm pa bann moun déor, sirtou si zot i débrouy myé ké ou dann la sosyété, avèk in bon sistèm piston i favoriz azot.

Kosa sa i pé an avoir konm rézilta ? Lé pa di i ariv pa in mové rézilta si lalkol, lo mékontantman sosyal i marsh plin tib, é si in bann démagog i ral bann fisèl. Donk dizon sé in n’afèr i fo vanj kont, in bann mové l’idé i fo tir dann la tèt in pé... Ni pé galman parl in n’ot kalité rasis, sète demoun i mète azot pla-vant dovan in moun étranj é i rod son konsidérasyon é i préfèr sa plito ké la konsidérasyon demoun zot la grandi an parmi.. Di pa moin zot i koné pa d’moun konmsa.

Mi arète tèr-la, soman mi domann shakinn fé travay son tèt la dsi é si lé posib, shant an kèr lo shanté lo group Bastèr, avèk bann paroli konmsa : "Rasis dan la kaz, sa ni vé pa ! l’anbyans dan la kaz, sa ni vé bien !"

 Justin 


Kanalreunion.com