Oté

Réjime Lurel ? Lé ziska danzéré !

Justin / 8 avril 2013

Zot i koné, dopi kinz mars, dan tout sipèrmarshé, lé sansé d’avoir in list produi pou fé fèr anou z’ékonomi. I parétré nana san uit produi dodan, é si ou i ashèt arienk bann produi-la, lé forsé ou i fé z’ékonomi.
Dopi kinz mars, moin lé fine alé kèk foi dann gran sirfas, é mi doi dir azot, moin la pa fé atansion ban produi-la. Sré t’i pars moin na poin l’abitid ashté bann marshandiz-la ? Sansa pars li lé plasé in l’androi i oi pa li forséman ? Donk, samdi moin la parti fé inn-dé komision é moin la romark bann produi lé an ba, kaziman o ra di sol. L’avé l’étikèt dosi, lété marké boukliyé kalité-pri. I tonm bien, moin té apré rod in paké kafé. Mi an apèrsoi, lo pri, sé in éro katrovin. Bon n’afèr mi di, solman mi rogard kosa na d’dan, mi oi san-pour-san kafé. Lé bien bon ! Mé san-pour san-kafé Robusta. La lé moin bon ! Pars an zénéral, i mélanz Robusta avèk Arabika, pou gingn boir : inn lé dir, l’ot lé dou ! Robusta tousèl i rash out fon d’gorj ! Moin lé sir, in moun i boir sa in kou, dé kou i trouv pi ali, mèm si lé bon marshé.
Boudikont, m’a dir aou, fransh vérité, moin lé pa dakor manj bann produi oblizé, pars moman doné, moin lé ragoulé, mi anpé pi, mésié, mi di aou. Pli pir, mi oi sa konm in zanr d’ségrégasion. Demoun, san bésé, i ashté produi zot la shoizi, sak lé zot otèr, é moin mi bès atèr pou moin alé shèrch bann marshandiz mésié Lurel la shoizi po moin. Mésié Lurel, ou i ariv ou la ? Alé dann in gran sirfas, ashté bann produi dsi out list, ariv out kaz sanm sa. Moin lé sir out madam i pil aou avèk roulo la patisri. Ou i koné, nout tout lé parèy : nou na in sèrtin gou, ni fé in sèrtin shoi. La pa sèt-la touléka. Out réjime, pou moin, li lé ziska danzéré.

 Justin 



Inn modékri, inn ti lavi, inn komantèr ?



Bann modékri andann forom






  • ya ya yaie depi bana la decidé fé sa a mwin mi la decidé pu consomé ! mi fé mon pain mwin mem gato po lécol mwin mem mi lé mem entrain préwar un ti parc po zanimo dan la cour di azot mangé zot manzé frodé zot mem !! boukliyé kalité pri ater po ri boukliyé po fé crevé a ou pli vit wi !!! mwin mi di si personne i consomé just sak zot i gagn pa fé zot mem rescap zot léconomi va fé pitié à la zot va réflechi !!! défoi fodré organizé un mvt installé 2 3 chaiz dan sipermarché assiz boir manzé trankil entr dalon ek band marmaill di le directeur lo magasin envoy la note po band ministr la po sik a nou nout liberté...
    merci po ot ti lartik t pa mové

    Article
    Inn modékri, inn ti lavi, inn komantèr ?


Kanalreunion.com