Oté

Républica, républica…

Justin / 24 séptanm 2013

Zot la fine antann parlé fèt la Salèt ? In fèt katolik tou lé z’an lo 19 sèktanm.
Moin mèm, kan moin té ankor marmay, nou té mars in gran bout a pié po alé, in dimans, troman di in zour i travay pa ! Moman kiltirèl.
Set ané, la bèz la sians : Sin-Lé la mèt sa si plizièr zour. Ziska yèr ankor 22, pou sak lé pa dan la fèt, bonzour lé déga.
Mi kit Sin-Dni an kar zone 15h35 èk mon garson, pou alé dan l’sid. Déza moin la pa ginye l’èksprès, navé tro d’moun ; bouskil, bouskil pa !
Pran Si-Pièr par lé o !
Oté, apré la tite ravine, kan la rout i komans désann si Sin-Lé, in l’anboutéyaz mon frèr !
A nou pri an otaz ! Ginye pi roulé ; lé bloké partou. Mi rogard la mèr ; mi pans koman dégaz sa, dan mon tèt mi voi un pon ki pas si d’lo, i atéri la Point o sèl ; ou byin in tinèl i pas par dosou.
Mi pans voila in réfleksyon pou lo mèr, okip dégaz son vil dan in ka parey. I paré sak ané lé konm sa !
Koman in rolizyon i pé blok tou lé sitoyin dan zot vi. Mi vé mi vé pa, moin lé oblizé partisip fèt la Salèt, mèm si lé pa mon rolizyon !?
Kat ou sink èr d’tan asiz dan lo bis ; ladan na poin toilèt !
Mi ariv Sin-Pièr, biento 8èr, gar routièr lé vid ; ginye pi alé nil par ! Domin mon marmay na l’ékol ; a moin mi sar travay gran matin.
Nou lé pu lib organiz nout vi konm ni vé. Na in problèm ! Pourtan lo rolizyon i près la sarité, l’antant, l’armoni, la pé, tou sa la ; mé là, koman i fé ?
Nou lé ankor an Républik sinon sa in group i akapar tout ! Na in n’afèr i kol pa ladan, mi trouv, din démokrasi, zot i pans pa konm sa ?
Républica, républica.

 Justin 


Kanalreunion.com