Oté

Réspèk la komisyon z’ékspèr !
Ranfors lo droi bann z’étidyan

Justin / 19 novanm 2010

Konsèy réjyonal i done bours bann z’étidyan i vé fé in travay séryé déssi in problèm k’i konsèrn nout réjyon. Sa sé in bon n’afèr ! Sa i pèrmète bann jènn diplomé travay troizan san tir lo dyab par la ké. Shak ané, in komité bann z’ékspèr l’inivèrsité i fé in klasman rant bann kandida épi Konsèy réjyonal i fé lo shoi, suivan lo nonm la bours li déside doné.

Konsèy réjyonal la pa suiv bann zékspèr

Promyé foi, sète ané, Konsèy réjyonal la pa suiv lo komité bann zékspèr, kisoi dési lo problèm lo l’étidyan i vé fé son roshèrch, kisoi déssi lo kapasité lo kandida pou ariv o-bi, kisoi ankor dési lankadroman lo bann kandida dann zot fitir travay roshèrch. La trap la list, la fou ki-dsi-tète, é lo méyèr la trouv ali moin bon, é lo moin bon la trouv ali méyèr. I prétan dir, la done inn-dé bours bann kandida la pa pran la pène pass dovan lo komité zékspèr. Sa sé in drol z’afèr, pars kisa lé plis kapab fé lo shoi an parmi bann kandida si la pa l’inivèrsité k’i suiv lo l’étidyan dann son travay roshèrch ? Li lé mal plasé pou kass lo shoi lo komité la fé. Konm di lo patoi : « Dé zyé i oi myé k’inn ! ».

Zordi, bann z’étidyan lé pa kontan, sirtou sak té byin plasé par lo komité é l’anvoy azot baladé. I done dé bours an plis, mé la pa lo bi. Lo bi, sé k’i réspèk légalité rant bann zétidyan. É lo sèl métode, mèm si i pé kritiké, sé d’réspèk lo shoi lo komité bann z’ékspèr épi ranfors osi lo droi kontesté *bann kandida.

* Na sirman in moiyin pou ranfors zot droi, avan pass dovan tribinal.

Justin


Kanalreunion.com