Oté

Réspèk la parol doné ? Sa lé pi dan l’èr di tan !

Justin / 4 zanvié 2012

Mi pans zot i koné kosa i lé in zirouète ? In zoizo an fèr, anmanshé dsi in kadran an métal épi sa i grins épi sa i tourn, i ro-grins épi i rotourn avèk lo van. Issi, mi pans pa moin la vi in zoizo konmsa, mé dann déssèrtin péi déor, nana zirouète. Si tèlman nana sa dann péi déor nana ziska bann éspésyalis pou sa. Mèm déssèrtin politik éspésyalizé la-dan, i ansèrv de sa pou zot rézoneman filozofik.

L’avé in boug téi apèl Edgard Faure, in gran éspésyalis bann zirouète dovan Bondyé, té i di : « Zirouète, Sa i tourn pa sa ! Sé lo van k’i shanj diréksyon ! » Dizon, nou ossi, ni pé kass in pé nout koko la-dsi, nout nivo. Pou kosa ? Pars kan in moun i di in n’afèr, konm par ébzanp, l’èr Gironcel (téi di Maurice, avèk sanglo dann gozyé !) i argingn son droi sivik, a l’èr, a la minite, a la ségone li rékipèr sa... nout tout konm in sèl om, sansa in sèl fanm, ni démisyone pou ardone ali son plas. Dyé mé piniss !

Bin kosa l’arivé don ? Gironcel la rogagn son droi sivik mé in pé la oubli démisyoné. Mèm in pé lé kandida. Mi sipoz pa pou pèrd zéléksyon ! Mé pou arpran la plas la popilasyon l’avé done Maurice. Kosa sa i vé dir ? Sa i vé dir sinploman in pé la shanj l’idé, la obli zot sèrman. Zordi, sanm pou moin, plas mèr i ral azot bien... é réspèk la parol doné, sa lé pi dann zot l’èr di tan.

Justin


Kanalreunion.com