Oté

RFO i vé shanj lo nom
Èk in koshon i pé pa fé in shoval de kours ?

Justin / 22 octobre 2010

Sak nana la shans, sansa la movèz shans, viv in pé vyé la konète Radio Sinni, l’ORTF, FR3, RFO... in bon pé kostime pou abiy lo mèm poupète. Pars, a byin rogardé sé Paris k’ i tir fisèl lo bann pantin. Byin péyé, mé pantin kant mèm ! Dan tou lé ka, La Rényon n’a poin son mo pou dir.

In drol sèrvis piblik
Kisa i pé oubli bann soir zéléksyon, kan l’avé fé la frode in pé partou, lo bann tablo rézilta troké té i pass dan télé, konm si de-riyin n’été. Ni oubli arpa non pli kan té i sèy roganiz la shass pou trap Paul Vergès dann son klandéstinité. É lo kréol té i trouv pa in plas kiltirel, mé solman in plas folklorik. É la sansir lo maloya, lo bann group i marsh pa lo pti doi déssi la koutir lo pantalon. Ziz pi kan l’avé in zéléksyon. L’èr-la, l’avé poin aryin pou anbar azot dann z’ot propagann la droite.

Dopi déor, mi oi lé shoz konm sa
Kan ou lé pa dann in ’afèr, ou i oi pa toute, sa lé sir. Nana gayar l’émissyon déssi RFO. Moin lé mèm sir nana in pé Rényoné i travay la-dan i sèye fé in nouvo radyo, sinonsa in nouvo télé, mé na tro lanspèk pou zot… Zordi RFO-Radyo la fine tonm byin ba dann sondaz. RFO-Télé, lé dézyèm déssi dé. Pétète la rékonpans pou sèrvis randi.
Zordi i vé shanj lo nom, apèl sa Outre-mer promyèr. Va shanj lé shoz konmsa ?Mi domann a oir mé mi doute, pars, pou moin, èk in koshon i pé pa fé in shoval de kours.

Justin


Kanalreunion.com