Oté

Rodé, bann rodèr, Zot i rode dann bon diréksyon !

Justin / 10 séptanm 2010

Dovine, dovinaye ! Kossa in shoz ? Moin na palto, moin la poin kilote... La-ba dan la France i apèl sa cafard. Issi La Rényon, li na in sèl nom sé kankréla. I pé pa di sa in zanimo demoun i èm, mi diré plito lo kontrèr. Zot i koné si sa la marsh dann sik, é si ou la mète sik-la dann out kafé... mi anplègn aou. Arzoute ankor déga sa i fé dann bann zaparèy éléktrik. Volnay la pa fé in séga déssi kankréla dann post radyo ! Armète ankor la-dsi, li fouy trou dann linz, li fé tash déssi... zot i konpran alors, pou kossa so zanimo-la nana in répitasyon konmsa.

Razèr d’pinte
Sa sé lo vré kankréla, mé nana ossi lo bann i zoué lo rol kankréla dan la sosyété. Olèrk éte itil, zot lé initil, dé foi mèm zot lé danzérab, in bann vré parazite ! Zot lé toultan la kan i fo gate la soss, fé d’tor, viv déssi kouraj lé zot. Déssèrtin patron sé in bann kankréla. Mèm to pou bann polisyin k’i sousyé pa lintéré zénéral. Parèy pou bann ladministrèr inkonpétan... dé foi mèm la min lé long. Oplis i monte sé oplis na kankréla. Gouvèrnman la France lé pa tro loin ète konmsa... li la raz nout pinte dépi troizan, li la rann sèrvis bann rish, é li la fé pèy sa par bann ti kolon. Moin lé a dmandé si in kankréla sré kontan ète konparé ansanm bann gran grèk konm sa.

I tarde pa, in médikaman !
Zot i kroiré pa, mi sorte antann dan la tète kankréla, i sa tir médikaman. Moin la pans nora pi ète in sorte vaksin kont linitilité, lo bann fo l’anons, sansa lo sindrome d’abizèr dsi... noré rann sèrvis koméla in n’afèr konmsa. Rode ankor in pé, bann rodèr, bann shèrshèr, mi pans zot i rode dann in bon diréksyon.

Justin

NB : i paré dann sèrvo kankréla i sa tir bann nouvo l’antibyot


Kanalreunion.com