Oté

Rokin dan la mèr, li lé son plass !

Justin / 23 févrié 2011

Matante Zélida la ékrir Justin :
Mon shèr nové, mon spès salté,
Mi pans, konm moin ou la vu lo zistoir rokin l’atak in tourist dan la mèr Sin-zil. Le moun té fé pityé pou vréman, sirtou li la vni issi konm touris é li té i fé pa d’tor pèrsone. Rozman, landomin, in lékip la parti la pèsh é la kapay in rokin bouldog, troi mète longuèr. Konm sa o moin, li manz ar pi d’moun. Mé pétète ou lé pa kontann sa ou ? Pars, bann rouj de fon-la, sa na drol-drol z’idé. In n’afèr sinp, pou zot sa lé konpliké. In n’afèr sinp, pou zot i fo fé in diskour dsi. In spès lésplikasyon i tien pa d’boute an zénéral. Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr,
Biensir lé tris kan in moun i fé blès ali par in rokin é pèrsone i pé pa souète in n’afèr konmsa. Sak lé sir, sé k’i fo bien inform demoun déssi bann danzé la natir. Mé, konm di bann moun instruyé, lo risk zéro kalbas i égzis pa.
I fo ni koné, la ras rokin lé an danzé pars demoun i shass azot tro, épi rokin, sa lé néssésèr pou lékilib la mèr. Ni vé, ni vé pa, mé lé konm sa. Alor, m’a dir aou, kan moin la vi lo gro rokin-bouldog tyé, sa la fé amoin in n’afèr. Mi koné pa si sak la fé sa la bien kalkil son jès, é kisa la done l’otorizasyon. Si sé pou vanj lo boug, zot jès lé in pé kouyon. Si sé pou éloign in danzé, i fodra arkomansé. Rokin dan la mèr, i fo ni rokoné, li lé son plass.

Justin


Kanalreunion.com