Oté

Roportaz ? Kosa k’i ansèrv, do riyin, konm d’abitid, malorozman !

Justin / 15 mé 2012

Moin la vi dann télé in fime dsi l’Alzéri. Té i port sirtou dsi in vil i apèl Mostaganem, in vil ousa shomaj i tap vréman. Mèm ke lo péi nana in bonpé rosours lo gaz épi pétrol, na poin vréman in politik sosyal pou sokour d’moun. La kaz na poin, demoun i viv an ta inn dsi l’ot. La vi lé si tèlman dir ké demoun i mèt l’ésans dsi zot épi flanm azot : zot i mor, sansa zot i rès malad... Moin la antann lo z’istoir in jène moun té i vann shosèt pou nouri son famiy, ziska l’èr la polis la vni fé armas ali son barda ; li la fé in zanr provokasyon, li la vèrs in lit l’ésans dsi li. La polis la tir in kou d’tazèr dan son l’éstoma é li la flanm konm in torsh. Li lé pa mor, mé la vi li mène, konm di lo kont, mi souèt pa sa mon pir l’ènmi.
Pou koué mi rakont sa ? Pa arienk pars sé in n’afèr la frap amoin dan mon pyé d’kèr, mé sé pou kriy, anou osi alon fé atansyon. Lé vré La Rényon nana in politik sosyal, lé vré nana in politik lojman mèm si lé pa sifizan, lé vré nana lo RSA. Tousa-la lé vré, mé sak lé ankor pli vré, sé ké shomaj i tap for dan nout péi. Ni koné bann shif, la pa bézoin ni rodi, mé sak ni gingn pa tro kalkilé, sé lo déga sa i fé dan nout popilasyon. Sak ni pé pa prévoir, sé koman d’moun lé riskab réazir... mi éspèr, mi pans pa lé shoz v’arèt konmsa, tèl ke sé ! Mi éspèr in pé, dan la ot, i kroi pa lé shoz v’alé konmsa ziska la fin dé tan.

La prèv ? Agard solman lo batlavé la droite i sort gagné. Agard solman l’éspoir nout pèp rényoné nana ankor dann fon zot mèm ! Kosa v’arivé si i trouv pa in bon solisyon ? Kosa v’arivé si ni mèt pa nou vitman dann raye nout dévlopman. Mi éspèr ni atann pa in vag suisid i tonm dsi nout péi. Zour-la, moin lé sir in pé va anlav lé min. Zour-la va fé roportaz. Roportaz solman ? Kosa sa i ansèrv ? De riyin, bien antandi ! Do riyin, konm d’abitid. Do riyin, malorozman !

 Justin 


Kanalreunion.com