Oté

Roul anou dan la farine, sa la pa in bon politik !

Justin / 14 mars 2012

Matant Zélida la ékrir Justin :
Mon shèr nové, mon spès salté
Ou i doi èt kontan mésyé Hollande la sort son program pou bann péi l’Outro-mèr ? Ou é tout zot bann rouj-de-fon i doi èt kontan... Konm pa ! Pars, sanm pou moin, mésyé Hollande la ékout azot, mé mi kroi pa la bien antann azot. Ou lé pa véksé si mi di aou, sanm pou moin, bononm-la la ro-anvoy kouryé out parti La Rényon épi bann sosyalis, péi la kas an paye in domi-répons. Dizon in répons in gouvèrnman la droite nora pa krash dési. An touléka, la pa son plan va nyabou tir nout pti péi dann malizé. Moin lé a d’mandé si dann zafèr-la, in pé i argrèt ar pa Sarko épi son bann z’idé dsi l’Outro-mèr. Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr,
Mi oi bien ousa ou i rod ral amoin. Ou i vé dir amoin, mésyé Hollande lé pli for pou akout son bann dalon La Rényon é na poin arien pou fèr èk nou, Parti kominis. Sa mèm ou i vé dir amoin ? Bin matant, si sak ou i di lé vré, sa i doi pa dékouraz anou. Pars si banna la-ba dan la Frans i romark pa, konm di lo kont, ni dor dsi in volkan, é moin la bien pèr demoun lé riskab rapèl azot la réalité. Trant pour san shomèr, sinkant pour san shomaj pou bann moin vinn-sink an, plis sinkant pour san dmoun dsou pa d’port la mizèr, plis trant-mil famiy i atann in kaz é la poin, é lo rèst, moin la poin la plas pou di. Konm di bann marin, sa la pa lo kalm pla ! Sa la pa in mèr an l’uil. Myé k’sa, tangaz i tard pa pou arivé. L’èr-la, si in pé i kroi roul anou dan la farine, sé in bon politik mi souèt azot bokou plézir. Tok ! Pran sa pou ou !

 Justin 


Kanalreunion.com