Oté

Rout litoral plis tram-train,
sansa ni inn, ni l’ot !

Justin / 12 octobre 2011

Na in moun la di amoin : "Mansonz, la pate lé kourt !". Moin la trouv, provèrb-la i bote amoin bien. Mé kosa li vé dir o-zis ? Li vé dir, sanm pou moin, kan ou i manti, ou i fé trap aou pli loin. Pars si la pate lé kourt, normalman ou i kour pa tro vite, é si ou i kour vite, ou i fatig pli vite ké sak nana la pate long. L’èr-la i trap aou. Donk, sa in kozman i bote amoin pars anplis ké sa, nou na in pti prézidan kourt fashé avèk la vérité... Pli pir, moin na konm dan l’idé, mansonz-la, sa lé konm in maladi kontazyé : oplis ou i frékant in sharjèr d’lo, oplis ou osi ou i arvien sharjèr d’lo. Dan lo ka d’lo prézidan, son l’antouraz pintade, son parti, l’UMP, lé kontaminé vèy pa koman.

Lé vré pou déor, lé vré pou isi galman. La bann la instal azot dan la Réjyon, é dépi zot boungkèr, zot i difiz. I ésplik pi, i kom ! I fé pi démonstrasyon, i fé la kominikasyon ! I fé pran d’moun blan pou noir, makaroni pou la bouji. Sak i fé pa, i di k’i fé, sak i fé, i makiy sa, i fo oir. Mé konm moin la di an-o la, mansonz, la pate lé kourt. La vérité i tard pa pou kol aou ! La siprime tram-train, mé dsi lo pos lé ankor la ? Ma rout litoral sis voi lé riskab kout troi milyar, olèrk in milyar sisan milyon. A moins k’i trouv trézor Labuz, mi oi pa koman i sa fé sa. Armète avèk sa ké lo gran négosyatèr, konm Fillon i di, la pa prévi pou finans lo dépasman. Kréol va péyé ? Sirman avèk bann z’anprin grèk, donk an moné lo sinz. La trass in kroi dsi la zéotèrmi, mé zordi ni antan k’i di i sava rolansé. Donk, sak la fé l’ot zour lété arienk pou pèrd lo tan.

Avan trass in kroi dsi sak avan ou la fé, i vo myé ou i sèy konprann sak l’ot, Paul Vergès, par l’fète la fé. Pou kosa la déside fé tram-train avan ? Pou gingn matéryo pou fé la rout littoral. Zordi i koné pa koman va fé pou trouv matéryo. Pou kosa l’avé déside fé in nouvo rout litoral ? Sinploman pars la rout littoral, konm li lé zordi, lé ménasé par in déboulmann kap. Kansa ? Pa zordi, pa domin, in zour, mé kan, i koné pa o-zis, mé kan va fé lo déboulaz, moin lé sir larm de san va koul pa mète kib.
Oplis lo tan i pass, oplis nou lé sir d’riyin. Nou té i doi an avoir in rout litoral épi in tram-train. Zordi, avèk Didier, nou lé riskab an avoir ni inn, ni l’ote.

Justin


Kanalreunion.com