Oté

Rout litoral sis voi : O dyab so bann moun-la k’i koné pa kont ziska sis !

Justin / 8 zwin 2011

Matant Zélida la ékrir Justin :
Mon shèr nové, mon spès salté,
A bon ! Zot la vi éstèr, zot, bann rouj-de-fon ! Zot i pas zot tan pou dir mésyé Didier i fé pa arien. Éstèr zot i oi lé shoj an vré. Zot la vi lo désin la rout litoral, koman sa lé joli. Zot la vi, kosa nora, san tardé rant Sin-Dni épi La Possession. In rout éstra, pasan dési la mèr ; in rout ousa kamiyon, loto, moto, lo bis, mèm in zour lo train va pasé. Zot la rodé ? zot la gagné ! Ala sak i ariv kann i arvaz guèp dann ni ; Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr,
Vi pé dir k’lé zoli, sirtou dési papyé, é san tardé, i rès a voir ! Pars moin na konm in doute, é mi koné pa si sa i sar pa fini an katédral kasé. Konm sa mèm i apèl in batiman kan i fini pa. Mé mi domann amoin si moin la révé ou si moin la vi pou vréman ; Moin la vi in désin, mé sanm pou moin, nana uit voi... kat in koté, kat l’ot koté. Moin la lir sa osi dann zournal. Myé, moin la antann dir na in BAU (band pou arète dann l’irzans), poitan na poin sa dann projé la Réjyon. La pa fé in l’érèr-la ? Sansa in pé na difikilté pou kaklilé, pou kont ziska sis.
Mi ansouvien, lo poèt Prévert la fé in fonnkèr dési bann roi d’Frans, dépi Loui 1 ziska Loui Dizuit ; in fonnkèr pou kas lé kui k’i tèrmine par : O dyab tout so bann-la k’i koné pa kont ziska vin. Zordi, kan mi majine la Réjyon, moin lé tanté d’dir : a l’instar di gran poèt Prévert : O dyab toute so bann-la ki koné pa kont ziska sis !

Justin


Kanalreunion.com