Oté

Rubrik ti shyen san kolyé, si ou i trouv, téléfone a moin !

Justin / 22 octobre 2013

Oté, noré tèlman d’shoz a dir su laktyalité : nana partou ; nana lo gran miting PCR o Por ; sak la suiv la vi la kantité domoun é la kalité domoun…

Nana so matin in dépité mèr sra dovan la zistis ; bon, li lé abityé lo zond radio, on diré li lé bransé 24 si 24.

Non, lo pli for, sé not minis loutremèr. Parlfèt, zot i koné, so mo “outremèr”, sé in mo i rolèv in sèrtin kolonialism, pars nou lé dan la mèr, pa outremèr ! Po nou, sé la Frans lé outremèr !

An Ostrali laba, moin la vi in kart alanvèr ; la mèt lo nor an ba, lo sid an o ; louèst a droit, ryink po fé tourn lespri bann Britanik, po zot repansé sé ki lo sant du mond.

Vandredi 18 oktob, diz èr é d’mi lo matin, mi antan nout minis ékspliké : Arèt di tout sé léta la done 7.000 kontra édé, la Rényon la itiliz ryink 2.000, alé bann zantropriz, koléktivité, zasosiasyon pran a zot an sharj, « allez-y, mettez du vôtre », arété d’polémiké, so péi, lo pli gran de tou lé zoutremèr, i regorz d’om de talan, antandé-vou lé zorganizasyon politik…

« Je koné lé zil, je vyin moi-même d’une ile, etc… ».

In vré pasaz savon an règ, li di pa « vou zèt dé zinkapab », non, li di égzaktoman lo kontrèr ; a ou, alé tir lo bon dan sak lé mové, mé a moin, kan mi akout sa, mon pti pé d’san i bouy ; mi di sé sa in om déta, sa in minis la Répiblik… Li la soizi lo bon radio byin popilèr, sak i vé antann i antann, lo piblik lo radio lé abityé, ladsi ou i trouv toultan an longèr zourné : « Perdi ti shyin san kolyé, si ou i trouv, apèl a moin !!! ».

Justin


Kanalreunion.com